Fyrsta tilfellið uppgötvaðist á fimmtudaginn þegar lögreglumaður tók eftir slæmri lykt í vegabréfsskoðunaraðstöðunni. Við nánari skoðun sá hann að búið var að maka saur á ýmsa staði, þar á meðal á stól.
Aftonbladet skýrir frá þessu. Á föstudaginn mætti hræðileg lykt lögreglumönnum þegar þeir gengu inn í matsal sinn í flugstöðinni. Þar var meðal annars búið að maka saur á sófa.
Lögreglan vinnur nú að rannsókn þessa skítamáls sem flokkast sem eignaspjöll. Það eru aðeins lögreglumenn og hreingerningarfólk sem hefur aðgang að rýmunum þar sem saur hefur verið makað. Ekki er myndavélakerfi á öllum stöðunum en starfsfólk þarf að nota aðgangskort til að komast inn og nú er verið að fara yfir hverjir fóru inn í rýmin á umræddum dögum.
Sófinn var fjarlægður úr matsalum og sýni tekin til DNA-rannsóknar en grunur leikur á að um mannasaur sé að ræða.
