Ef þú elskar Tiramisu og espressokaffi er þetta hinn fullkomni eftirréttur fyrir þig. Til að toppa þennan himneska rétt er framsetningin en hér er hann borinn fram í fallegum martini glösum sem setur punktinn yfir i-ið. Þessi réttur kemur að sjálfsögðu úr smiðju eldhúsgyðjunnar Nigellu Lawson og ítalska bragðið nýtur sín til fulls.

Tiramisini

Fyrir 4

100 ml expresso eða sterkt skyndikaffi

2 msk kaffilíkjör

4 stk. Savoiardi-fingurkökur (fínar fingurkökur úr svampdeigi)

2 stk. eggjahvítur

250 g Mascarponeostur

2 msk hunang

2 msk marsalavín

1 tsk. gæðakakóduft

4 lítil martini glös (um 125 ml)

Búið til espresso og hellið í könnu sem þolir vel hita, hellið kaffilíkjörnum út í, látið kólna. Á svölum degi dugar að láta þetta kólna í um það bil 10 til 15 mínútur við opinn glugga. Brjótið niður hvern Savoiard-fingur í 4 bita og setjið í martini glösin, hellið síðan kældri expressoblöndunni yfir þá. Þjappið varlega saman og gætið þess að kökurnar séu allar í bleyti. Þeytið síðan eggjahvíturnar þar til hægt er að mynda úr þeim mjúka toppa. Setjið til hliðar um stund. Mokið mascarponeostinum í aðra skál og setjið hunang út í. en þetta er til að fá sætubragðið. Þeytið saman. Þegar osturinn og hunangið hafa blandast vel saman, bætið þá marsalavíninu útí og þeytið, ef þið viljið ekki nota það má setja sykur í staðinn. Hrærið síðan eggjahvítunum varlega saman við, þriðjung í einu, setjið þá blönduna með skeið yfir gegnblautar kökurnar í hverju glasi og notið skeiðina til að mynda toppa efst. Látið glösin í kæli a.m.k. 20 mínútur og allt að sólarhring. Upplagt að gera þennan rétt daginn áður en það á að bera hann fram. Fyrir notkun sáldrið þá kakói yfir í gegnum fíngert sigti, rétt áður en tiramisini rétturinn er borinn fram.