Sigmar Vilhjálmsson athafna- og fjölmiðlamaður hefur fest kaup á bæjarblaðinu Mosfellingi í Mosfellsbæ.
Þetta kemur fram í fréttatilkynningu.
Í tilkynningunni segir að Sigmar taki við rekstri þess með það að markmiði að byggja ofan á sterkan grunn blaðsins og þróa það áfram sem öflugan og nútímalegan miðil fyrir íbúa og atvinnulíf Mosfellsbæjar.
Mosfellingur hefur um árabil verið undir ritstjórn Hilmars Gunnarssonar en í tilkynningunni segir að hann hafi leitt blaðið í yfir tvo áratugi og gegnt lykilhlutverki í samfélags- og menningarlífi Mosfellsbæjar. Undir hans stjórn hafu blaðið fest sig í sessi sem einn af hornsteinum upplýsinga og tengingar í bænum.
„Mosfellingur er ekki bara miðill, hann er hluti af sjálfsmynd bæjarins. Það er mikill heiður að taka við slíku verkefni og byggja áfram á því trausti sem hefur skapast í gegnum árin,“ segir Sigmar.
„Mosfellingur á að vera rödd fólksins í bænum, vettvangur þar sem sögur, viðburðir og mannlíf fá að njóta sín. Við ætlum að halda í það sem gerir blaðið sérstakt, en jafnframt þróa það áfram í takt við tímann.“
Með kaupunum hyggst Sigmar styrkja miðilinn enn frekar, bæði í prenti og á stafrænum vettvangi, og skapa ný tækifæri fyrir fyrirtæki og stofnanir til að ná til íbúa svæðisins með markvissari hætti.
Í tilkynningunni segir einnig að samhliða þessum breytingum hafi verið gengið frá ráðningu nýrra lykilaðila í ritstjórn og framleiðslu blaðsins. Hafrún Hafliðadóttir hafi verið ráðin ritstjóri Mosfellings og muni leiða efnisstefnu og ritstjórn blaðsins. Davíð Gunnarsson hafi verið ráðinn umbrotsmaður og muni bera ábyrgð á útliti og framsetningu þess. Bæði séu þau Mosfellingar og sé markmiðið að byggja upp teymi úr heimafólki sem þekki vel til samfélagsins og styrki þannig tengingu blaðsins við nærumhverfið. Sigmar muni sjálfur ekki taka þátt í daglegum rekstri blaðsins, heldur leggja áherslu á stefnumótun og frekari uppbyggingu miðilsins.
Hilmar Gunnarsson, fráfarandi ritstjóri Mosfellings, segir mikilvægt að miðillinn haldi áfram að þróast og vaxa:
„Mosfellingur hefur alltaf verið byggður á tengingu við fólkið í bænum og það skiptir mig máli að sá andi haldist. Ég tel að Sigmar komi inn með ferska sýn og kraft sem getur styrkt miðilinn enn frekar á næstu árum.“
Hann bætir við:
„Það hefur verið ánægjulegt að leiða Mosfelling í gegnum árin og sjá hvernig hann hefur vaxið með samfélaginu. Nú tekur við nýr kafli og ég er sannfærður um að blaðið sé í góðum höndum.“
Sigmar segir að virðing fyrir arfleifð Mosfellings sé lykilatriði:
„Það sem Hilmar hefur byggt upp er einstakt og það verður áfram grunnurinn að okkar vinnu. Við ætlum að byggja ofan á það, ekki breyta því sem virkar, heldur styrkja það og þróa áfram.“
Segir að lokum að kaup Sigmars marki þannig upphaf nýs kafla í sögu Mosfellings, þar sem reynsla og rótgróin staða mæti nýrri sýn og frekari uppbyggingu.
