Íslensk og pólsk stjórnvöld hafa lýst yfir stuðningi við málsókn Úkraínumanna gegn Rússum í sérstökum dómstól á vegum Evrópuráðsins. Þar með hefur Úkraína náð nægum fjölda meðmæla til þess að láta fara fram atkvæðagreiðslu um málið.
„Við erum þakklát félögum okkar á Íslandi og Póllandi fyrir að taka þetta mikilvæga skref,“ sagði Andrii Sybiha, utanríkisráðherra Úkraínu, í færslu á samfélagsmiðlum. „Þetta eru tímamót. Með 17 meðmælendum erum við komin yfir hið lögformlega lágmark ríkja til að geta greitt atkvæði um málið.“
Einnig var greint frá málinu á vef Stjórnarráðsins í gær. Það er að íslensk stjórnvöld hafi staðfest aðild sína að samningi um að koma á fót stjórnarnefnd sérstaks dómstóls vegna glæpa gegn frið í Úkraínu á vettvangi Evrópuráðsins.
„Ísland stendur sem fyrr dyggilega við bakið á úkraínsku þjóðinni og við erum staðráðin í því að standa vörð um alþjóðalög og tryggja að Rússar verði látnir bera ábyrgð á grimmdarverkum sínum í Úkraínu,“ segir Þorgerður Katrín Gunnarsdóttir utanríkisráðherra.
Dómstólnum verður ætlað að ná til glæpa sem lögsaga Alþjóðlega sakamáladómstólsins nær ekki til. Komið hafi fram í ályktun allsherjarþings Sameinuðu þjóðanna að mikilvægt væri að tryggja ábyrgðarskyldu Rússa vegna alvarlegustu glæpanna samkvæmt þjóðarétti á yfirráðasvæði Úkraínu með viðeigandi, sanngjörnum og óháðum rannsóknum.
Áður höfðu 15 ríki staðfest stuðning við hinn nýja dómstól. Það eru Noregur, Svíþjóð, Þýskaland, Bretland, Holland, Lúxemborg, Spánn, Portúgal, Slóvenía, Eistland, Lettland, Litháen, Króatía, Moldóva og Kosta Ríka.
Þar sem tilteknum lágmarksfjölda hefur verið náð getur málið verið tekið fyrir á ráðherrafundi Evrópuráðsins í Chisinau, höfuðborg Moldóvu, dagana 14. til 15. maí næstkomandi.
Að sögn Sybiha þýðir þetta hins vegar ekki að Úkraína sé hætt að safna stuðningsaðilum að dómstólnum. Sóst verður eftir stuðningi bæði innan og utan Evrópu áfram. Hvatti hann lönd til þess að staðfesta stuðninginn til þess að tryggja að rússnesk hernaðaryfirvöld og pólitískir valdhafar verði látnir sæta ábyrgð á glæpum sínum.
En þetta snúist ekki aðeins um Rússa og þetta stríð. Þetta sé réttlætismál sem snúist um framtíðina og að alþjóðalög haldi.
