Meirihlutinn í Reykjavík vill banna unnar kjötvörur sem aðalmáltíð á matseðlum borgarinnar. Einar Þorsteinsson, oddviti Framsóknar og fyrrum borgarstjóri, er ekki lukkulegur með þessa stefnu og segir að börnum í grunnskólum borgarinnar sé þar með meinað að fá slátur og grjónagraut í skólanum sem og kótilettur í raspi.
Borgarfulltrúinn Dóra Björt Guðjónsdóttir furðar sig á gagnrýni Einars. Hún skrifar á Facebook:
„Einar Þorsteinsson, oddviti Framsóknarflokksins, hefur greinilega ákveðið að gera það að pólitísku baráttumáli að halda ótakmörkuðu unnu kjötmeti inni í skólum. Það er þrátt fyrir skýrar ráðleggingar um að draga úr neyslu þess vegna heilsufarsáhættu.“
Nú þegar meira er vitað um tengsl mataræðis og heilsu barna ákveði Einar að standa vörð um versta kostinn – unnar kjötvörur.
„Af hverju er verið að berjast fyrir pylsum í skólum og helst án allra takmarkana – en ekki fyrir betri næringu? Hverskonar frelsi er það?“
Dóra Björt segir að flestar fjölskyldur geti ákveðið það sjálfar hvort og þá hvenær pylsur séu á matinn á heimilum þeirra. Hlutverk skólanna eigi að vera að stuðla að gæða næringu og styðja við hollar venjur frekar en að grafa undan þeim. Börnin eigi það besta skilið.
„Forgangsröðun Framsóknarflokksins er þá allavega skýr – pylsurnar og unna kjötmetið er í öruggum höndum. En hvað með börnin okkar?“
Einar svarar Dóru og segir flesta sammála um að börn eigi að fá heilnæman og góðan mat en tillaga meirihlutans hvorki útfærð né kostnaðarmetin.
„Augljóslega eintóm sýndarmennska rétt fyrir kosningar. Fullt tilefni til að gera góðlátlegt grín að því.“
