Ummælin féllu bæði í langri færslu Trumps á samfélagsmiðlum og síðar í samtali við blaðamenn eftir að hann kom til Washington frá Flórída í gærkvöldi.
„Ég er ekki aðdáandi Leós páfa,“ sagði Trump og bætti við að hann teldi páfann „ekki vera að standa sig mjög vel“.
Tilefni gagnrýninnar virðist hafa verið orð Leós um helgina þar sem hann gaf í skyn að „blekking um almætti“ væri meðal þess sem knýr áfram stríð Bandaríkjanna og Ísraels gegn Íran. Þótt páfar og forsetar hafi oft verið á öndverðum meiði í alþjóðamálum er afar sjaldgæft að orðaskiptin verði jafn persónuleg og hörð.
Í færslu sinni sagði Trump að páfinn væri „VEIKUR gagnvart glæpum og hræðilegur í utanríkismálum“ og bætti við: „Ég vil ekki páfa sem telur í lagi að Íran hafi kjarnorkuvopn.“
Sömu sjónarmið ítrekaði hann síðar við blaðamenn.
Trump lét þó ekki þar við sitja heldur tengdi gagnrýni sína einnig öðrum alþjóðamálum. Hann sagðist ekki vilja „páfa sem telur hræðilegt að Bandaríkin hafi ráðist á Venesúela“, með vísan til aðgerða stjórnar hans gegn Nicolás Maduro fyrr á árinu.
Forsetinn hélt því jafnframt fram að staða Leós í Vatíkaninu tengdist því að hann væri Bandaríkjamaður.
„Ef ég væri ekki í Hvíta húsinu, væri Leó ekki í Vatíkaninu,“ skrifaði Trump og bætti við: „Leó þarf að taka sig á sem páfi, nota heilbrigða skynsemi, hætta að þjóna róttæka vinstrinu og einbeita sér að því að vera frábær páfi, ekki stjórnmálamaður.“
