Albanskur maður, sem handtekinn var á Norðurgötu á Akureyri þann 10. mars, en á lögheimili í Albaníu, hefur verið ákærður fyrir fíkniefnalagabrot og peningaþvætti.
Maðurinn er sakaður um að hafa haft í fórum sínum rúmlega 40 grömm af kókaíni og rúmlega hálft kíló af maríhúana. Hann er jafnframt sakaður um að hafa aflað sér ávinnings með sölu á fíkniefnum eða öðrum refsiverðum brotum, að fjárhæð 120 þúsund krónur sem fundust í fórum hans.
Ekki hefur tekist að birta manninum ákæru og er hún því birt í Lögbirtingablaðinu ásamt fyrirkalli þar sem ákærði er hvattur til að mæta fyrir dóm þegar málið verður þingfest við Héraðsdóm Norðurlands eystra þann 27. maí næstkomandi.
