Arctic Fish tilkynnti á dögunum að flytja eigi fóðurstöð fyrirtækisins á Ísafjörð, en til þessa hefur fóðurstöðin verið til húsa í Blábankanum á Þingeyri og þar starfa 9 manns. Fóðurstöðin verður sameinuð höfuðstöðvum fyrirtækisins á Ísafirði en öllu starfsfólki er boðið að halda starfi sínu og verður boðið upp á ferðir á vinnutíma fyrir starfsfólk.

Þessi ákvörðun hefur vakið mikla reiði en bæjarstjóri Ísafjarðarbæjar, Sigríður Júlía Brynleifsdóttir, segir þetta mikið áfall fyrir íbúa Þingeyrar og muni þessi ákvörðun hafa mikil áhrif á samfélagið. Formaður hverfisráðs Ísafjarðarbæjar á Þingeyri segir að þetta muni hafa ófyrirsjáanlegar afleiðingar fyrir byggðina, en íbúafundur er fyrirhugaður á morgun.

Eyjólfur Ármannsson innviðaráðherra er vægast sagt ósáttur og segir í samtali við hádegisfréttir Bylgjunnar að hann muni beita sér fyrir því að Arctic Fish dragi ákvörðunina til baka.

„Verðmætasköpunin hjá þessu fyrirtæki er fyrst og fremst í Dýrafirði, ekki gleyma því. Og þetta er algjörlega með hreinum ólíkindum. Samfélagsábyrgð þessa fyrirtækis virðist ekki vera nein, engin. Ég skil mjög vel reiði Þingeyrar og ég deili þeirri reiði algjörlega.“

Eyjólfi var nokkuð heitt í hamsi, eða svo mátti ráða af talandanum, og sagði ákvörðunina skerða lífsgæði íbúa, þar á meðal fjölskyldufólks sem hafi komið sér upp húsnæði á Þingeyri og séu þar með börn í leikskóla.

„Það er verið að koma aftan að fólki, það er verið að koma aftan að íbúum Dýrafjarðar, íbúum Þingeyrar og þeim sem voru að tala máli fiskeldisins í síðustu kosningabaráttu, það var ekki auðveld barátta á sínum tíma, og að nú skuli fyrirtækið voga sér að koma svona fram við Dýrfirðinga og Þingeyringa, það finnst mér bara algjört hneyksli.“

Eyjólfur segir að það þurfi að vera samfélagsleg sátt um fiskeldi, einkum þegar um er að ræða brothættar byggðir sem Þingeyri hefur verið skilgreind sem. Þetta sé ekki forsvaranlegt og skorar hann á fyrirtækið að taka ákvörðun sína til baka.