Héraðsdómur Reykjavíkur hefur sýknað fyrrverandi stjórnendur flugfélagsins WOW air af skaðabótakröfu fjárfesta að fjárhæð 18,5 milljónir evra, sem samsvarar um 2,8 milljörðum íslenskra króna.
Málið var höfðað af ellefu aðilum, meðal annars fjárfestingasjóðum frá Bandaríkjunum, Noregi og Íslandi, sem tóku þátt í skuldabréfaútboði WOW air sem lauk í september 2018, þar á meðal Kviku eignastýring ehf. og GAMMA Capital Management hf. Stefnendur töldu að stjórnendur félagsins hefðu vanrækt upplýsingaskyldu sína og leynt fjárhagslegum vanda félagsins á þeim tíma sem útboðið fór fram.
Stefndu í málinu voru Skúli Mogensen, stofnandi og fyrrverandi forstjóri WOW air, auk annarra stjórnarmanna sem voru þau Liv Bergþórsdóttir, Helga Hlín Hákonardóttir, Davíð Másson og Basil Ben Baldanza, sem nú er látinn.
Hin stefndu neituðu alfarið sök í málinu og sögðu að allar ákvarðanir hefðu byggst á þeim upplýsingum sem tiltækar voru á þeim tíma. Jafnframt var bent á að umfangsmiklar viðræður við fjárfesta hafi átt sér stað fram á síðustu stundu áður en félagið fór í þrot í mars 2019.
Í stuttu máli féllst dómurinn ekki á að sýnt hafi verið fram á orsakasamband milli háttsemi stjórnenda og tjóns fjárfestanna og þar með var engin skaðabótaskylda. Lagt var til grundvallar að stjórnendur hefðu ekki haft forsendur til að lýsa félagið gjaldþrota við skuldabréfaútboðið. Því voru allir stefndu sýknaðir af kröfum stefnenda.
Var stefnendum gert að greiða stefndu málskostnað sameiginlega, alls 28 milljónir króna.
