Utanríkisráðuneyti Íslands hefur keypt nýjan sendiherrabústað í Aker Brygge sem er í miðborg Oslóar í Noregi fyrir 750 milljónir króna.
Íbúðin er 363 fermetrar og seljandinn er Stefan Strandberg, fyrrum landsliðsmaður í fótbolta, sem keypti hana árið 2020 fyrir tæpar 477 milljónir króna og seldi hana nú íslenska ríkinu fyrir 750 milljónir króna eins og áður segir, eins og norski miðilinn E24 greinir frá. Strandberg vildi þó fyrst fá 816 milljónir króna þegar hann setti eignina á sölu, en lækkaði verðmiðann.
Strandberg hafði átt eignina í viku þegar hann fékk tilboð upp á 566 milljónir sem hann hafnaði, en viðkomandi hækkaði boðið í 629 milljónir króna sem Strandberg hafnaði einnig. Sagðist hann í samtali við fjölmiðla á þeim tíma að hann hefði lengi leitað að íbúð, og sú á Aker Brygge tikkaði í öll boxin og hann væri hæstánægður með kaupin og ætlaði sér alls ekki að selja.
Íbúðin var upphaflega þrjár íbúðir sem voru sameinaðar í eina áður en Strandberg varð eigandi. Fjárfestingafyrirtækið Haare keypti íbúðirnar árin 2001 og 2003 fyrir 330 milljónir samtals og gerði þær að einni.
Eins og sjá má á teikningunni af íbúðinni eru þar meðal annars tvær stórar stofur, tvö eldhús, fjögur baðherbergi, þrennar svalir, auk þess sem þrenn bílastæði fylgja. Íbúðin er einnig með einkalyftu. Nóg pláss ætti því að vera fyrir móttökur og veislur sendiherrans.
Fyrri sendiherrabústaður í Bygdøy-hverfi í Ósló var settur á sölu í apríl og virðist enn óseldur þar sem eignin er á vefsíðum fasteignasala, sem dæmi hér. Ásett verð er rúmlega 950 milljónir króna. Húsið fór áður á sölu árið 2009 en ekki fékkst nægilega gott tilboð þá. Mun húsið krefjast töluverðs viðhalds.
RÚV greindi frá því þegar húsið fór á sölu og í svari frá utanríkisráðuneytinu sagði að á undanförnum árum hafi áhersla verið lögð á að flytja úr kostnaðarsömum og viðhaldsfrekum einbýlishúsum í minni eignir sem eru hagkvæmari í rekstri, krefjast minna viðhalds og eru með hærra öryggisstig.
Einar Sveinbjörnsson veðurfræðingur er hneykslaður á kaupum íslenska ríkisins á nýja sendiráðinu og spyr hann af hverju sendiráðið þarf að vera í dýrasta hverfinu í Osló.
„FLOTT SKAL ÞAÐ VERA!
Af hverju þarf sendiráð Íslands í Noregi íbúð í dýrasta hverfi Oslóar undir sendherrann sinn, sem kostar heilar 750 milljónir?
Alltaf þessi kjánalegi flottræfilsháttur eða er þetta bara gamla minnimáttarkenndin sem hrjáð hefur litla Ísland frá lýðveldisstofnun og brýst fram með þessum hætti?“
