Ummælin tengjast viðbrögðum Þjóðverja við skemmdarverkunum á Nord Stream gasleiðslunum á síðasta ári en sprengjur voru sprengdar við þær og þær gerðar ónothæfar. Ekki er vitað hver eða hverjir voru að verki.
„Málið er að evrópskir stjórnmálamenn hafa sagt opinberlega að Þýskaland hafi aldrei orðið fullkomlega fullvalda ríki eftir síðari heimsstyrjöldina,“ sagði Pútín á rússnesku ríkissjónvarpsstöðinni Rossiya-1.
Hluti af Þýskalandi var bandarískt hernámssvæði eftir lok síðari heimsstyrjaldarinnar eða frá 1945 til 1949.
Hvað varðar sprengingarnar við Nord Stream gasleiðslurnar þá hafa Þjóðverjar sagt að sprengingarnar hafi ekki verið neitt óhapp en hafa hafnað því að segja hver geti hugsanlega borið ábyrgð á þeim.
Nýlega kom fram í erlendum fjölmiðlum að heimildir bandarískra og þýskra leyniþjónustustofnana bendi til að hugsanlega hafi hópur, hliðhollur Úkraínumönnum, verið að verki. Þetta hefur ekki fengist staðfest.
Áður höfðu verið vangaveltur um að Rússar hafi staðið á bak við skemmdarverkin. Enn aðrir hafa bent á Bandaríkin og enn aðrir á Úkraínu. Öll ríkin neita því að hafa átt hlut að máli.
Rússar segja þetta hafa verið hryðjuverk og hafa gefið í skyn að Vesturlönd hafi staðið á bak við það.