En því fer víðs fjarri að stríðinu sé lokið en árangur síðustu daga hlýtur að hafa kveikt enn frekari neista í hjörtum Úkraínumanna og verður þeim væntanlega hvatning í þeim átökum sem eru fram undan.
Valerii Zaluzhnjyi, sem er æðsti yfirmaður úkraínska hersins, tjáði sig nýlega um hvernig hann sér fyrir sér að stríðið muni þróast þegar horft er til lengri tíma. Þetta gerði hann í grein sem úkraínska fréttastofan Ukrinform birti. Meðhöfundur greinarinnar er þingmaðurinn Mykhailo Zabrodskyi sem var áður hermaður.
Í greininni kemur skýrt fram að þrátt fyrir að Úkraínumenn eigi góðu gengi að fagna þessa dagana þá gerir Valerii sér enga von um að stríðinu sé að fara að ljúka. „Þetta verður langvarandi stríð, sem mun valda miklu mannfalli og ótrúlegum kostnaði, sem ekki er að sjá að sé að fara að ljúka,“ skrifa þeir.
Þeir segja að engin ástæða sé til að telja að stríðinu ljúki á þessu ári. Þeir benda á að Rússar séu með hernaðarlegt frumkvæði og að víglínan sé um 2.000 kílómetrar að lengd.
Þeir segja að það geti vel hugsast að það verði yfirráð yfir Krímskaga, sem Rússar hertóku og innlimuðu í rússneska ríkjasambandið 2014, sem muni ráða niðurstöðu stríðsins: „Að því gefnu að yfirráð yfir Krím eru mjög mikilvæg, þá er rökrétt að ætla að verið sé að undirbúa áætlun eða margar áætlanir um endurheimt skagans árið 2023.“
Þeir benda einnig á að enn sé sú hætta fyrir hendi að Rússar grípi til þess örþrifaráðs að beita gjöreyðingarvopnum, kjarnorkuvopnum.
