Á föstudaginn var í Héraðsdómi Reykjavíkur kveðinn upp dómur í skaðabótamáli manns vegn Vátryggingafélagi Íslands. Maðurinn gerði kröfur um bætur upp á rúmlega 140 milljónir króna úr ábyrgðartryggingu ökumanns sem hann sat í bíl með.
Atvikið átti sér stað árið 2017. Bílnum var ekið á gangstéttarkant, fór yfir gangstéttina, lenti á ljósastaur og kastaðist síðan utan í klettavegg áður en hann valt og staðnæmdist á hægri hlið. Átti slysið sér stað um hálfimmleytið að nóttu. Þegar lögregla kom á slysstað lá maðurinn fastur undir hægri hlið bílsins með andlitið við jörðu. Fætur hans lágu undir bílnum og virtist mikið undið upp á líkamann.
Maðurinn var ekki með lífsmörk en var endurlífgaður á slysa- og bráðadeild LSH. Miklar afleiðingar voru af slysinu, bæði skammtíma- og langtíma. Starfsgeta mannsins var skert um langan tíma og skammtímaminni hans var mjög takmarkað. Einnig átti hann lengi í vanda með tal og málskilning.
Vátryggingafélag Íslands gerði upp við manninn árið 2019 en skerti bætur hans um 2/3 þar sem hann væri meðsekur í atvikinu. Ástæðan er sú að hann settist upp í bíl með ökumanni sem hann vissi að væri drukkinn. Hafi hann sýnt af sér stórkostlegt gáleysi, að setja upp í bílinn, vitandi af ástandi ökumannsins, en þeir höfðu verið lengi einir um nóttina og setið við drykkju. Vísbendingar eru um að drukkið hafi verið áfengi í bílnum áður en slysið varð.
Um þetta efni var meginágreiningur málsaðila en svo fór að Héraðsdómur Reykjavíkur var sammála afstöðu tryggingafélagsins og sýknaði það af öllum kröfum mannsins.
