Afkomendur Jóns Hafsteins Oddssonar, Nonna, sjá sig knúna til að senda frá sér tilkynningu vegna útgáfu bókarinnar Álfadalur – Sönn saga um kynferðisofbeldi, þöggun og afleiðingar þess. 

Afkomendurnir gera ekki athugasemd við útgáfu bókarinnar heldur vilja leiðrétta misskilning sem komið hefur upp í tengslum við útgáfuna, að Nonni sé ofbeldismaðurinn í sögunni. Í kynningartexta um bókina í Bókatíðindum segir meðal annars:

„Í þessari bók rekur Guðrún Jónína Magnúsdóttir sögu móður sinnar, Sigurbjargar Oddsdóttur frá Álfadal á Ingjaldssandi. Þetta er saga harðrar lífsbaráttu, hroðalegrar grimmdar og lamandi meðvirkni svo lesandann rekur í rogastans. En það er líka saga af ótrúlegri þrautseigju og viljastyrk konu sem tekst að lifa innihaldsríku lífi þrátt fyri hörmuleg áföll.“ 

Ofbeldismaðurinn var faðir þeirra

Sævar Þór Jónsson sendir frá sér tilkynninguna fyrir hönd afkomenda Jóns Hafsteins Oddssonar og er hún eftirfarandi:

„Að gefnu tilefni vill Sævar Þór Jónsson lögmaður fyrir hönd umbjóðenda sinna, afkomenda Jóns Hafsteins Oddssonar (Nonna) og Guðmundu Jónínu Guðmundsdóttur (Mundu), koma eftirfarandi á framfæri vegna útgáfu bókarinnar Álfadalur: Sönn saga um kynferðisofbeldi, þöggun og afleiðingar þess eftir Guðrúnu Jónínu Magnúsdóttur.

Eins og fram kemur í Bókatíðindum rekur höfundur sögu móður sinnar í bókinni, Sigurbjargar Oddsdóttur frá Álfadal á Ingjaldssandi sem þola mátti hræðilegt kynferðisofbeldi. Með ofangreint í huga og fjölda ábendinga og misskilnings sem upp hefur komið, telja afkomendur Nonna og Mundu sig nauðbeygða að árétta að ofbeldið var ekki framið af Nonna, en hann var oftast kenndur við Álfadal þar sem hann bjó lengi.

Hið rétta er að ofbeldismaðurinn var faðir þeirra Nonna og Sigurbjargar, Oddur Valgeir Gísli Guðmundsson. Afkomendur Nonna og Mundu vonast til að útgáfa bókarinnar auki vitund lesenda og opni og styrki enn frekar umræðu og baráttu samfélagsins gegn kynferðisofbeldi, þöggun og meðvirkni.

Sævar Þór Jónsson, lögmaður, lrl, MBA“