Brynja Guðjónsdóttir hefur verið ráðin markaðsstjóri Orkunnar og hóf störf á dögunum.
Hún kemur til Orkunnar frá Krónunni þar sem hún starfaði í markaðs og umhverfismálum. Brynja er með bakkalárgráðu í markaðsfræði og alþjóðaviðskiptum frá Háskóla Íslands.
Í tilkynningu er haft eftir Jóhönnu Margréti Gísladóttur, framkvæmdastjóra þróunarsviðs Orkunnar:
„Það er frábært að fá Brynju í Orkuliðið. Við erum á fleygiferð að byggja upp fjölbreytt vörumerki sem og dótturfélög Orkunnar með áherslu á að einfalda líf viðskiptavina okkar á snjallan, hagkvæman og umhverfisvænan hátt. Þekking og reynsla Brynju smellpassar inn í vegferðina okkar.”
Orkan rekur í dag sjötíu sjálfsafgreiðslustöðvar fyrir eldsneyti sem og tvær fyrir vetni og eina fyrir metan. Eins rekur Orkan verslanir í eigin nafni, 10-11 og Extra. Dótturfélög Orkunnar eru Löður, Lyfjaval, Gló og Íslenska Vetnisfélagið.