Yoko Ono, listakona og ekkja Bítilsins John Lennon, hefur krafist þess að brugghús í Frakklandi hætti að framleiða bjór þar sem vísað er í hann. Bjórinn hefur verið mjög vinsæll og nafnið vakið mikla athygli.

Greint er frá málinu í miðlinum The Local í Frakklandi.

Bjórinn sem um ræðir kallast John Lemon, framleiddur af brugghúsinu Brasserie de l’Imprimerie á Bretónsskaga. Eins og nafnið gefur til kynna eru notaðar sítrónur við framleiðslu bjórsins.

Í marsmánuði barst Aurelien Picard, eiganda brugghússins, krafa frá lögmönnum Yoko Ono um að hætt yrði að framleiða bjór með nafni John Lennon.

Var frönsku bruggurunum hótað á bilinu 150 til 1000 evrum í sektir á dag. Það er allt að 145 þúsund krónum.

„Þau kröfðust þess að við innkölluðum allar vörurnar og hættum að nota vörumerkið,“ segir Picard.

Eftir samninga við lögmenn var fallist á það að brugghúsið mætti selja lagerinn sinn, það er þær 5 þúsund flöskur sem eftir voru, en hætta framleiðslu á bjórnum.

Er brugghúsið nún að leita að öðru vörumerki sem getur slegið í gegn eins og John Lemon.