Svo gæti farið að við tilteknar aðstæður verði frönskum kjarnorkuvopnum komið fyrir á sænskri grund.
Þetta kemur fram í umfjöllun SVT, sænska ríkissjónvarpsins.
Fyrsti fundur á milli yfirvalda í Frakklandi og Svíþjóð um áætlanir um fælingarmátt Evrópuríkja, með kjarnorkuvopnum, hefur átt sér stað. Frakkar áttu frumkvæðið að umræddri áætlun en hún er sögð viðbrögð við aukinni tortryggni og tregðu Bandaríkjanna gagnvart samstarfi á vegum NATO og auknum efasemdum um að Bandaríkin muni gera nokkuð til að koma öðrum NATO-ríkjum til hjálpar á stríðstímum.
Hvað umrædd áætlun mun fela í sér er þó enn óljóst.
Fundurinn átti sér stað í París í síðasta mánuði.
Sænskir sérfræðingar tjá SVT að mögulega muni þessar áætlanir hafa í för með sér aukna samvinnu milli ríkjanna um heræfingar sem feli í sér undirbúning og þjálfun við að verja franskar herflugvélar sem geti borið kjarnorkuvopn. Mögulegt sé einnig að hluti af þessum áætlunum verði að slíkar flugvélar gætu verið staðsetttar í Svíþjóð tímabundið t.d. ef aðstæður skapist í öryggismálum sem krefjist slíks viðbúnaðar. Til að mynda ef Svíþjóð verði ógnað með kjarnorkuvopnum.
Sérfræðingarnir minna á að ákvörðun um að koma fyrir kjarnorkuvopnum á sænskri grund verði alltaf á endanum tekin af stjórnmálamönnum. Sænska þingið leyfir ekki slíkt á friðartímum en sérfræðingarnir benda á staða öryggismála í heiminum hafi þróast þannig að það sé ekki lengur auðvelt að greina á milli friðar og stríðs en það geti varla talist svo að nú séu friðartímar.
Ef t.d. Rússar leggi aukinn þrýsting á Svíþjóð og önnu NATO-ríki geti mögulega orðið nauðsynlegt að frönsk kjarnorkuvopn verði á sænsku landsvæði.
Fimm af átta flokkum á sænska þinginu vilja að Svíþjóð taki þátt í áætluninni um fælingarmátt Evrópuríkjanna en fjórir þeirra styðja að á stríðstímum verði kjarnorkuvopnum komið fyrir í landinu. Ríkisstjórnarflokkarnir; Moderaterna, Frjálslyndir og Kristilegir demókratar auk stuðningsflokksins Svíþjóðardemókrata og Miðflokksins, sem er í stjórnarandstöðu, styðja þátttöku Svía í áætlun Frakka. Jafnaðarmenn lýsa efasemdum og vilja fremur halda sig við núgildandi varnaráætlanir NATO.
Stjórnarflokkarnir auk Svíþjóðardemókrata styðja að á stríðstímum heimili sænska stjórnvöld að kjarnorkuvopn verði staðsett í landinu en ekki á friðartímum en síðastnefndi flokkurinn útilokar það þó ekki. Miðflokkurinn og Jafnaðarmenn svara því ekki beint hvort þeir styðji að á stríðstímum verði kjarnorkuvopn í Svíþjóð.
Flokkarnir lengst til vinstri, Umhverfisflokkurinn og Vinstri flokkurinn, eru hins vegar alfarið á móti því að Svíþjóð komi í auknum mæli nálægt kjarnorkuvopnum.
Þingkosningar eru framundan í Svíþjóð í september og samkvæmt skoðanakönnunum nú myndi stjórnarandstaðan ná meirihluta á þingi sem ætti að þýða að vinstri stjórn undir forystu Jafnaðarmanna yrði mynduð þótt að það sé vel mögulegt að hin hefðbundna blokkaskipting í hægri og vinstri verði brotin upp. Verði vinstri stjórn mynduð virðist miðað við svör flokkanna ekki loku fyrir það skotið að möguleg þátttaka Svía í þessari áætlun Frakka verði endurskoðuð.
