Þrír létust og tugir slösuðust í hræðilegu skrímslatrukkaslysi í Kólumbíu. Á meðal látinna er tíu ára gömul stúlka.

Breska blaðið The Daily Mail greinir frá þessu.

Slysið átti sér stað síðdegis á sunnudag í borginni Popayan í vesturhluta Kólumbíu. Mikill fjöldi fólks var þar saman kominn til að sjá skrímslatrukka, það er breytta jeppa á stórum dekkjum, keyra yfir alls konar hindranir.

Eins og sést í myndbandi sem náðist af slysinu þá keyrir einn bíllinn yfir hindranirnar en sveigir svo skyndilega til hægri og inn í áhorfendaskarann.

Áhorfendunum var mjög brugðið og reyndu að flýja en bíllinn var á allt of miklum hraða og ökumaðurinn, kona að nafni Sonia, virtist ekki hafa neina stjórn á bílnum. Öryggisveggurinn gerði lítið, bíllinn ók á tugi áhorfenda og hafnaði á rafmagnsstaur.

Fjöldahjálparstöð var opnuð og mikið viðbragð hjá öllum tiltækum aðilum sem gátu hjálpað, sjúkralið, lögregla og slökkvilið. Því miður létust 3 í slysinu, þar af 10 ára gömul stúlka sem var úrskurðuð látin á staðnum. Einnig slösuðust 38 manns, misalvarlega.

„Ég hef gefið út nákvæmar skipanir um ítarlega rannsókn þessa atviks,“ sagði Juan Carlos Munoz Bravo, borgarstjóri. „Þessir atburðir, sem áttu aldrei að geta gerst, munu verða skýrðir með fullu gagnsæi og þeir dregnir til ábyrgðar sem bera hana.“

Er meðal annars til skoðunar hvort að staðurinn hafi uppfyllt öll öryggisskilyrði, til að mynda varðandi öryggisveggi.