Útlitið er dökkt hjá Chelsea eftir hörmulegt gengi undanfarið og er allt útlit fyrir að liðið nái ekki Meistaradeildarsæti, sem gæti haft þung áhrif á efnahaginn.

Chelsea hefur tapað sex leikjum í röð í ensku úrvalsdeildinni og aðeins skorað eitt mark. Síðasta tapið kom gegn fallbaráttuliði Nottingham Forest í fyrradag, 1-3 á heimavelli.

Liam Rosenior var rekinn úr starfi stjóra Chelsea eftir aðeins nokkra mánuði á dögunum og aðstoðarþjálfarinn Calum McFarlane tók við til bráðabirgða. Það er því ekki ljóst hver stýrir liðinu á næstu leiktíð.

BBC fjallar um stöðu Chelsea, til að mynda fjárhag félagsins. Þar kemur fram að félagið hafi tapað 262 milljónum punda fyrir skatt á síðasta ári, þrátt fyrir að vera með um 490 milljónir í tekjur.

Með því að missa af Meistaradeildarsæti gæti félagið misst af yfir 100 milljónum punda í tekjur. Það er því ekki til að bæta stöðuna.

Eignarhald Chelsea, með Tott Boehly í fararbroddi, hefur mikið verið gagnrýnt undanfarið, aðallega af stuðningsmönnum.