Árásum Ísraelsmanna á kristna á herteknum svæðum í Líbanon fer fjölgandi. Þá er hatur gegn kristnum einnig á uppleið í Ísrael. Nýlega var ráðist á franska nunnu í Jerúsalem.

Hatur á kristnu fólki virðist vera á uppleið í Ísrael, bæði innan hersins og á meðal almennra borgara. Ráðist hefur verið á kristið fólk og kristnar táknmyndir að undanförnu.

Síðastliðinn þriðjudag, þann 28. apríl, var ráðist á franska nunnu í Jerúsalem. 36 ára ísraelskur maður hefur verið handtekinn fyrir hina tilhæfulausu árás.

Hélt hún myndi deyja

Eins og sést á öryggismyndavélum hrindir hann nunnunni sem fellur í gangstéttina, hrópa ókvæðisorðum að henni og sparkar svo í hana þar sem hún er enn þá liggjandi eftir fallið.

Nunnan er af reglu dóminíkana og starfar sem vísindamaður við Biblíu og fornleifafræðiskólann í Jerúsalem. Eins og segir í umfjöllun sjónvarpsstöðvarinnar France 24 um málið þá er nunnan ekki mjög alvarlega slösuð á líkama en er í losti eftir árásina sem kom eins og þruma úr heiðskíru lofti.

Sjá einnig:

Ísraelar eyðileggja trúartákn kristinna manna – Prestur segir þetta ekki í fyrsta sinn

Rektor skólans, Olivier Poquillon, segir að hún hafi haldið að hún myndi deyja, árásin var svo ofbeldisfull. Hefði ekki verið stigið inn í hefði farið enn verr.

Gyðinglegir öfgamenn

Árásin er talin vera til marks um aukna hörku gyðinglegra öfgamanna. Ljóst er að þeir beita sér bæði gegn múslimum og kristnu fólki. Árásin á nunnuna er ekki einsdæmi.

Á undanförnum árum hefur verið ráðist að nunnum, pílagrímum og öðrum sem bera kristin tákn. Einnig að kirkjum og öðrum kristnum byggingum. Árið 2025 voru atvikin skráð 181 talsins, þar af tugir líkamsárása.

Eyðilögðu klaustur

Þetta andrúmsloft haturs sést glöggt í hegðun ísraelskra hermanna á hernumdum svæðum í suðurhluta Líbanon. En um þriðjungur Líbana eru kristnir.

Fyrir um tveimur vikum síðan var greint frá því að ísraelskir hermenn hefðu eyðilagt líkneski af Jésú Kristi við heimili í bænum Debel, austast á hernumdu svæðunum í Líbanon.

Sú árás er heldur ekki einangrað tilvik því að fleiri koma sífellt upp. Á laugardag, 2. maí, var greint frá því að ísraelskir hermenn hefðu eyðilagt klaustur í bænum Yaroun. Um er að ræða grískt nunnuklaustur af reglu Salvator.

Ísraelsher hefur viðurkennt að hafa skemmt klaustrið. Er því haldið fram að Hezbollah hefðu notað staðinn til að fremja árásir frá og að engin merki væri um að þetta væri klaustur eða trúarleg bygging.