Íslenskur maður, rúmlega þrítugur, hefur stefnt rússneskri eiginkonu sinni, sem er 23 ára, til lögskilnaðar. Til vara krefst hann skilnaðar að borði og sæng.
Stefna íslenska mannsins í málinu er birt í Lögbirtingablaðinu þar sem ekki hefur tekist að birta stefnuna eiginkonu hans.
Þar kemur fram að fólkið var gefið saman hjá Sýslumanninum á höfuðborgarsvæðinu seint í apríl árið 2024, eftir stutt samband. Í júlí sama ár flutti konan fyrirvaralaust til Rússlands og sleit þar með samvistum við manninnn.
„Lagði stefnandi fram beiðni um skilnað hjá Sýslumanninum á Höfuðborgarsvæðinu þann 4. febrúar 2026. Allar samningaviðræður við stefndu hafa reynst árangurslausar. Þá hefur stefnda neitað að mæta til Sýslumanns og neitar þannig að láta sig málið varða. Sýslumaður vísaði því frá beiðni hans um lögskilnað þann 18. mars 2026,“ segir í stefnunni.
Maðurinn krefst skilnaðar á grundvelli 37. greinar hjúskaparlaga, þar sem segir að hafi hjón slitið samvistir vegna ósamlyndis geti hvort þeirra krafist lögskilnaðar þegar samvistaslit hafa staðið yfir í eitt ár hið minnsta. Bendir hann á að meira en ár er liðið frá því konan sleit samvistum við hann og flutti til Rússlands.
Málið verður þingfest við Héraðsdóm Reykjavíkur þann 11. júní næstkomandi. Konunni er birt fyrirkall og henni stefnt til að mæta við þingfestinguna. Geri hún það ekki má búast við að útivistardómur gangi í málinu, sem þýðir að dómur verður kveðinn upp án þátttöku hennar.
