Morðið á Gísla Þór Þórarinssyni í Mehamn í Noregi vakti mikla athygli hér á landi í apríl og maí árið 2019. Gunnar Jóhann Gunnarsson, hálfbróðir Gísla, var grunaður um morðið en hann var í fyrra dæmdur í 13 ára fangelsi fyrir verknaðinn.
Dómurinn var síðar mildaður í 5 ár fyrr á þessu ári en Gunnar hefur haldið því fram að ekki hafi verið um morð af ásetningi að ræða. Gunnar segist hafa mætt með byssuna til Gísla til að hræða hann en slysaskot úr byssunni hafi hæft hann í lærið.
Norski fjölmiðillinn Nordlys greinir nú frá því að Gunnari hafi verið sleppt úr haldi. Ástæðan fyrir því er sú að málinu var áfrýjað til hæstaréttar og verjandi Gunnars, Bjørn Andre Gulstad, fór fram á að honum yrði sleppt úr haldi fram að úrskurði hæstarættar. Lögreglan í Noregi var því andvíg og vildi hafa Gunnar í haldi fram að úrskurðinum.
„Honum er sleppt í dag,“ sagði Anja Mikkelsen Indbjør, lögmaður lögreglunnar, á blaðamannafundi vegna málsins í dag.
Bjørn Andre ræddi við iFinnmark um málið. „Hann hefur núna setið inni í 2 ár. Ég held að það sé mikilvægara fyrir hann að honum sé sleppt núna svo hann geti tekið til í lífinu sínu frekar en að honum sé haldið í fangelsi,“ sagði Bjørn Andre.