AFC Bournemouth hefur staðfest ráðningu Marco Rose sem nýs aðalþjálfara félagsins.

Rose, sem er 49 ára, skrifar undir þriggja ára samning og mun taka við liðinu að loknu tímabilinu 2025/26. Hann kemur til félagsins með mikla reynslu úr evrópskum toppfótbolta, en hann hefur áður stýrt liðum á borð við Red Bull Salzburg, Borussia Dortmund, Borussia Mönchengladbach og RB Leipzig.

Andoni Iraola ákvað að hætta störfum að loknu tímabili.

Bournemouth leggur þó áherslu á að núverandi tímabil sé enn í fullum gangi og að fókusinn sé á að klára það með sterkum hætti. Liðið er á góðu skriði þessa dagana og hefur verið taplaust í 13 leikjum.

Forráðamenn félagsins segjast hlakka til að taka á móti Rose á Vitality Stadium í sumar þegar hann tekur formlega við starfinu.