Ágúst Guðmundsson stóð nýverið frammi fyrir því að sitja næstu áratugi inni í alræmdu fangelsi í Taílandi vegna árásar á starfsfólk verslunar í borginni Pattaya á suðurströnd Taílands. Svo fór ekki því hann mútaði yfirvöldum og náði að smygla sér til Íslands. Ágúst segist í samtali við DV vera nýkominn heim til Íslands og má heyra á honum að hann sé þakklátur að vera laus.

Hann gerir ekki lítið úr glæpum sínum en ljóst er að vistin í fangelsinu hefur ekki verið góð. Hann hafi lent í gengjum og innfæddir hafi ráðist á hann. Óhætt er að segja að gróf mannréttindabrot hafi átt sér stað í fangelsinu og þurfti hann til að mynda að sofa á gólfinu ásamt nærri 30 öðrum föngum.

Atvikið átti sér stað síðastliðið sumar og fjölluðu erlendir fjölmiðlar, svo sem breska ­dagblaðið Daily Mail, um það. Ágústi var neitað um afgreiðslu á áfengi sem varð til þess að hann beitti piparúða á starfsmennina og stal sígarettum og freyðivíni. ­Atvikið náðist á upptöku og birtu taílenskir miðlar hana á netinu.

Aðstoðarverslunarstjórinn lýsir atburðarásinni á þessa leið: „Við sáum hann á rölti fyrir utan búðina. Síðan kom hann inn og bað um fá að kaupa áfengi. Hann var dónalegur og við létum hann vita að við mættum ekki selja honum áfengi á þessum tíma dags. Hann brást illa við og spreyjaði á okkur. Mig sveið í augun, þetta var virkilega sárt. Við höfðum samband við lögregluna sem brást skjótt við og handtók hann.“

Ágúst segir að árásin hafi ­verið framin í algjöru ölæði og hann sjái mikið eftir henni. „Ég átti að fá 20 til 30 ára dóm, lágmark 20 ára, en mér tókst að komast út úr landi með mútum. Félagar mínir náðu að borga tryggingargjaldið tveimur vikum áður en ég átti að mæta fyrir dóm. Ég komst í samband við mann sem er snillingur í því að koma fólki út úr landi. Hann bara mútaði yfirlögregluþjóni og landamæraeftirlitinu og ég náði að komast í burtu,“ segir Ágúst. Hann segist nú vera ­stórskuldugur þar sem frelsið kostaði hann um þrjár milljónir króna. „Ég skil ekki hvernig ég fór að þessu, bæði heppni og tilviljun.“