Ný sjónvarpsauglýsing fyrir Mottumars var frumsýnd í kvöld. Bolli Már og Hjálmar Örn, skemmtikraftar og útvarpsmenn á K100 fara með aðalhlutverkið í auglýsingunni. Boðskapur Mottumars í ár er „Ertu að grínast með þinn lífsstíl?” en honum er ætlað að vekja athygli karlmanna á lífsstílstengdum áhættuþáttum.
Krabbameinsfélagið vill vekja athygli á því að minnsta kosti þriðja hvert krabbameinstilvik tengist lífsstíl. Þó að það sé ekki hægt að tryggja sig gegn því að fá krabbamein, þá er hægt að draga úr líkunum á krabbameinum með því að huga að heilbrigðum lífsstíl. Má þar nefna:
Óheilsusamlegur lífsstíll er summan af mörgum litlum, slæmum ákvörðunum sem teknar eru hversdagslega yfir langan tíma. Hver og ein ákvörðun vegur ekki þungt en samanlagt geta þær skaðað heilsuna og meðal annars aukið líkurnar á krabbameinum.
Í auglýsingunni er fylgst með ungum manni (Bolla Má) sem er skellihlæjandi í góðri stemningu með góðum félögum. Þeir drekka, reykja, borða ruslfæði og þegar tími gefst, kíkja þeir í ljósabekki.
Um tveimur áratugum síðar, þá er söguhetjan (Hjálmar Örn) enn skellihlæjandi í sukkinu, en hann er nú einn síns liðs þar sem félagarnir virðast hafa fengið sig fullsadda af téðum lífsstíl. Þessar óheilbrigðu lífsvenjur, yfir langan tíma koma að lokum í bakið á söguhetjunni.
Lagið „Líf ertu að grínast” með Prins Póló er spilað undir auglýsingunni.
Vörumerkjastofan Tvist vann auglýsinguna með Krabbameinsfélaginu. Framleiðsla og kvikmyndataka var á vegum Republik og Magnús Leifsson leikstýrði.
Mottumarssokkarnir í ár eru hannaðir af Berglindi Häsler, ekkju Svavars Péturs og eiganda Havarí, í samstarfi við Björn Þór Björnsson (Bobby Breiðholt). Björn hefur undanfarin ár tekið að sér að viðhalda safni myndrænna sköpunarverka Svavars Péturs sem lést úr krabbameini árið 2022. Svavar Pétur var best þekktur sem tónlistarmaðurinn Prins Póló. Hönnun sokkana byggir á kórónunni sem var hans helsta og íkonískasta tákn.
Allur ágóði af sölu sokkanna rennur til rannsókna-, fræðslu- og stuðningsstarfs Krabbameinsfélagsins.
