Orðið á götunni er að stórsigur Tisza flokks Péters Magyar á Fidesz flokki Viktors Orbán í þingkosningunum í Ungverjalandi um helgina sé mikið áfall fyrir trumpíska öfgaflokka um víða veröld. Orbán átti vísan stuðning bæði Pútíns Rússlandsforseta og Trumps Bandaríkjaforseta. Trump sendi meira að segja varaforseta sinn, J.D. Vance til Búdapest til að lýsa sérstökum stuðningi við Orbán og láta taka af sér mynd með honum. Það fór nú eins og það fór.

Þess má geta að 20. apríl 2025 fór Vance í Vatíkanið að hitta Francis páfa. Degi síðar var páfinn allur. Af þessu má draga þá ályktun að heimsóknir frá Vance færi mönnum hvorki lán né lukku.

Orðið á götunni er að afgerandi ósigur Orbáns sé mikið áfall fyrir trumpista um allan heim og merki um að um alla Evrópu sé stuðningur við þá byrjaður að fjara út. Guð láti gott á vita.

Sigur Magyars var svo stór að allt lítur út fyrir að hann ráði yfir þingstyrk til að vinda ofan af stjórnarskrárbreytingum sem Orbán á 16 ára ferli hefur keyrt í gegn til að takmarka lýðréttindi, mismuna minnihlutahópum og ógna lýðræðinu í Ungverjalandi. Stjórnartíð hans hefur einkennst af spillingu.

Þá hefur sigurinn þau áhrif að nú getur ESB aukið stuðning sinn við Úkraínu, en Orbán hefur, einn leiðtoga innan ESB, staðið í vegi fyrir slíku af alkunnum undirlægjuhætti gagnvart Pútín.

Magyar lýsti því yfir eftir að kosningasigurinn varð ljós að Ungverjaland verði nú á ný sterkur bandamaður innan ESB og NATO

Orðið á götunni er að öfgahægripeðin á Íslandi hafi nú misst bandamann sinn rétt eins og þeir Trump og Pútín og óneitanlega sé útlitið dekkra nú fyrir lýðskrumara og hægriöfgamenn en var fyrir helgi.

Orðið á götunni er að forvitnilegt verði að fylgjast með gengi hægriöfgamanna hér á landi í komandi sveitarstjórnarkosningum. Kosningabarátta Miðflokksins í Reykjavík þykir til að mynda ekki hafa farið björgulega af stað þar sem oddviti flokksins birti myndskeið af sjálfum sér að leita að bílastæði í göngugötu. Vandræðalegt tal hans um bílastæðaskort í göngugötunni heyrðist svo vart fyrir hávaðanum í nagladekkjunum á Teslunni hans.