Á föstu verðlagi hefur dregið nokkuð úr kortaveltu Íslendinga í nóvember milli ára. Kortaveltan í nóvember 2023 nam 91,64 milljörðum króna og hækkar um 5,6 prósent milli ára. Á sama tíma hefur verðbólguhraði hér á landi verið um átta prósent og því dregur úr veltu á föstu verðlagi. Þetta kemur fram í nýjum tölum frá Rannsóknarsetri verslunarinnar.
Meira dregur úr erlendri kortaveltu Íslendinga á föstu verðlagi. Hún nam 17,15 milljörðum og jókst aðeins um 3,7 prósent milli ára.
Athygli vekur að netverslun Íslendinga eykst um 15,1 prósent milli ára og nam 18 milljörðum í nóvember. Einnig er athyglisvert að veltan í dagvöruverslun nemur 23,2 milljörðum króna í nóvember og hækkar um 17,2 prósent milli ára, eða ríflega tvöfalt meira en verðbólgan. Kortaveltan í dagvöruverslun er um 25 prósent af heildarkortaveltunni í nóvember, sem er mikil aukning frá árinu 2022.
Kortaveltan í fataverslun nemur 4,07 milljörðum í nóvember og heldur vel í við verðbólgu milli ára.
Andrés Magnússon, framkvæmdastjóri Samtaka verslunar og þjónustu, segir þessar tölur vera athyglisverðar. Sérstaklega veki aukning í dagvöruverslun og netverslun athygli. Andrés segir að þegar horft sé til jólaverslunar sé mikilvægt að hafa í huga að hún hafi nú færst fram og búast megi við að jafnvel um helmingur jólaverslunarinnar hafi átt sér stað í nóvember meðal annars vegna stórra afsláttardaga í þeim mánuði. Aðspurður segir hann ekki útilokað að meira en helmingur jólasölunnar verði í nóvember.
Andrés segir um mikla aukningu dagvöruverslunar að svo virðist sem fólk geri betur við sig í mat og drykk þegar þrengir að, þetta hafi komið berlega í ljós í hruninu, og haldi fremur að sér höndum þegar kemur að stærri innkaupum og gjafavöru. Nú þrengi að heimilum vegna vaxtakostnaðar og birtingarmyndin virðist, líkt og í hruninu, vera aukning í dagvöruverslun.