Helgi Gunnlaugsson afbrotafræðingur, sem vanalega tjáir sig sem hlutlaus sérfræðingur um þann málaflokk, hefur nú lagt orð í belg í baráttunni fyrir sveitarstjórnarkosningarnar um næstu helgi. Helgi varar við stefnu Sjálfstæðisflokksins, þar sem Borgarlínu er hafnað, heitið frekari uppbyggingu í útjöðrum höfuðborgarsvæðsins og staðinn vörður um veru Reykjavíkurflugvallar í Vatnsmýrinni.

Helgi Gunnlaugsson segir að gisin úthverfastefna Sjálfstæðisflokksins frá fyrri tíð hafi leitt yfir borgina það ástand umferðartafa sem nú ríki. Mikilvægt sé að koma á samræmdri byggðastefnu fyrir allt höfuðborgarsvæðið.

Helgi ritar eftirfarandi pistil um málið á Facebook-síðu sinni:

„X-D stefnir í stærsta sigur sinn í Rvík frá því á velmektarárunum í byrjun aldarinnar, fá amk þriðjung atkvæða og með Viðreisn er stórveldistíminn mættur aftur. Kosningastrategían vel heppnuð og ágeng, STRAX í lykilhlutverki til að takast á við þéttingu byggðar og umferðaröngþveiti. Þúsundir íbúða áformaðar í Keldnalandinu, Úlfarsárdal og Mosfellsbær byggir Blikastaði með þúsundum íbúða – Geldinganes í sjónmáli líka.

Ártúnsbrekkan sprungin núna, STRAX í dag annar því þessari fjölgun ekki og alls ekki ef hik kemur á Borgarlínuna sem nýtur lítils stuðnings í einmitt þessum jaðarbyggðum.

Ekki má hreyfa við heilögu kúnni í Vatnsmýrinni eða minnka flugvöllinn þótt alþjóðaflugið sé farið og innanlandsflugið berjist í bökkum.

Úthverfastefnan gisna sem sköpuð var á 20. öld og er bakvið umferðartafirnar í dag verður því aftur í öndvegi sem aldrei fyrr. STRAX verður því örugglega teygjanlegt hugtak þegar XD tekur aftur við stjórn Rvíkur með Viðreisn + e-ir aðrir einsog á þarf að halda eftir kosningar.

Löngu er kominn tími á samræmda byggðastefnu alls höfuðborgarsvæðisins í anda samgöngusáttmálans til að takast á við hreint makalausa fjölgun íbúa – við höfum byggt upp sirka 5-6 Akureyri bara á þessari öld. Ótrúlegur kraftur. Sundrað svæði leysir ekki þennan vanda svo vel sé.“