Miðað við reynsluna af stjórnsýslu Sjálfstæðisflokksins í sjö ára vinstri stjórn Katrínar Jakobsdóttur merkir orðið STRAX í orðabók Sjálfstæðisflokksins tímasetning í framtíðinni. STRAX eftir nokkur ár eða bara einhvern tímann í framtíðinni. Frá árslokum árið 2017 til ársloka árið 2024 undi Sjálfstæðisflokkurinn hag sínum vel í vinstri stjórn Katrínar Jakobsdóttur, mestu kyrrstöðustjórn síðari áratuga á Íslandi. Margt var sagt, fögur fyrirheit og slegið um sig með innantómum slagorðum.
Hér þarf einungis að benda á eitt dæmi um kyrrstöðuna sem Sjálfstæðisflokkurinn stóð fyrir og tók virkan þátt í með Vinstri grænum og Framsókn. Fyrir lá brýn þörf á meiri orkuframleiðslu í landinu. Öllum átti að vera ljóst að meiri orkuframleiðsla var þá þegar orðin forsenda þess að áfram yrði unnt að byggja upp í iðnaði og öðru atvinnulífi á Íslandi. Viðbótarorkuframleiðsla var forsenda hagvaxtar í landinu og það þoldi enga bið. Ráðherra Sjálfstæðisflokksins, Guðlaugur Þór Þórðarson, fór með embætti orku-iðnaðar-og loftslagsráðherra. Búist var við því að hann léti hendur standa fram úr ermum og tryggði grundvöll fyrir verulegri aukningu orkuframleiðslu í landinu. Þegar hann lauk ráðherraferli sínum í þessu ráðuneyti hafði ekkert gerst. Árangurinn var núll. Í upphafi ferilsins sagði hann eins og frambjóðendur flokksins núna: „Það er svo fljótlegt að breyta – STRAX.“ Svo liðu árin og ekkert gerðist.
Orðið á götunni er að eftirmaðurinn á ráðherrastóli, Jóhann Páll Jóhannsson, hafi leyst niður um Guðlaug Þór, pólitískt, þegar honum tókst á einu ári að koma af stað orkuframleiðslu í landinu með stjórnvaldsákvörðunum sem munu skila sjö sinnum meira afli en ákveðið var á Íslandi í tíu ár þar á undan. Þannig fara menn að því að láta verkin tala og gera það sem gera þarf STRAX.
Þegar kemur að því að treysta á að Sjálfstæðisflokkurinn bregðist hratt við er reyndin sú að sporin hræða. Dæmið um Guðlaug Þór hér að framan er bara eitt af fjölmörgum. Þess vegna eru slagorð flokksins núna innantóm. Kjósendur vita betur og geta byggt á reynslu. Staðreyndin er sú að það þarf að fara aftur á síðustu öld til að finna góð dæmi þess að kjörnir fulltrúar flokksins hafi látið verkin tala og brugðist við STRAX.
Þegar kemur að myndun meirihluta í borgarstjórn Reykjavíkur eftir kosningar þurfa kjósendur að glöggva sig á því hvernig landið liggur og hvaða flokkar og flokksleiðtogar séu líklegir til að geta unnið saman. Oddviti Framsóknar hefur þegar lýst því yfir að hann myndi aldrei vinna með Samfylkingunni, takist honum að ná kjöri. Aðrir hafa ekki tjáð sig opinberlega um þetta. Málatilbúnaður Miðflokksins þykir fremur ógeðfelldur, bæði í sveitarstjórnum og ekki síður á landsvísu. Grímulaus Trumpismi er fáum að skapi utan Miðflokksins og hluta Sjálfstæðisflokksins.
Orðið á götunni er að flokkarnir sem halda uppi málþófi og tafaleikjum á Alþingi í hverju málinu á fætur öðru eigi mikla samleið. Þar er um að ræða Sjálfstæðisflokkinn, Miðflokkinn og Framsókn. Þessir flokkar eiga samleið og því skyldu þeir ekki eiga samleið í borgarstjórn? Samkvæmt nýjustu skoðanakönnunum gætu þeir samtals náð tíu borgarfulltrúum kjörnum. En það þarf víst tólf fulltrúa til að mynda meirihluta.
Kjósendur hljóta að velta því fyrir sér hvaða aðrir flokkar gætu hugsað sér að ganga inn í samstarf við þá flokka sem láta öllum illum látum á Alþingi. Tæplega flokkarnir sem mynda meirihluta þar og bera ábyrgð á ríkisstjórn sem stjórnarandstaðan hamast gegn með illum vilja öllum stundum. Málþóf og vanstillt framganga stjórnarandstöðuflokkanna á Alþingi það sem af er þessu kjörtímabili hefur valdið rofi í pólitísku starfi á Íslandi nú um stundir. Það mun vissulega setja mark sitt á komandi sveitarstjórnarkosningar. Tækifærum sem áttu að geta skapast hefur þegar verið kastað á glæ.
Trúa menn því að það gæti gerst að Sjálfstæðisflokkur og Samfylking mynduðu meirihluta fái þessir flokkar samtals 12 borgarfulltrúa?
Trúa menn því að Viðreisn gæti hugsað sér það hlutverk að leiða Sjálfstæðisflokkinn til valda í Reykjavíkurborg eftir 16 ár í eyðimörkinni?
Ekki eftir allt sem á undan er gengið
Orðið á götunni er að svarið sé NEI. Án hiks og alveg STRAX.
