Nú er ekki víst að margir hafi lesið þessi ósköp þar sem blaðið fer ekki víða og þykir Svarthöfða þá rétt að gera örstutta grein fyrir hvað er verið að afhjúpa. Það er nefnilega samsæri gegn landsmönnum í tengslum við þjóðaratkvæðagreiðslu sem fyrirhuguð er í ágúst að áliðnum slætti.
Samsærið fólst í því að ráðherrar í ríkisstjórninni væru að tala við alls konar dyraverði í Evrópusambandinu um mögulega þjóðaratkvæðagreiðslu um framhald viðræðna. Og nefndir hafa verið ýmsir dyraverðir eins og Maros Sefcovic utanríkisviðskiptastjóra ESB, Kaju Kallas utanríkismálastjóra og Mörtu Kos stækkunarstjóra ESB, að Ursulu von der Leyen, forseta framkvæmdastjórnarinnar ógleymdri.
Svarthöfða þykir sem höfuðið hafi verið bitið af skömminni þegar hann sér á forsíðu Morgunblaðsins í dag að meira að segja Jonas Gahr Støre forsætisráðherra Noregs og Donald Tusk forsætisráðherra Póllands tóku þátt í þessu svívirðilega háttarlagi.
Auðvitað nær ekki nokkurri átt ráðherrar í ríkisstjórn Íslands séu að ræða við forystumenn í selskap sem Evrópusambandið er. Svarthöfða finnst engu breyta þótt það standi í sáttmála sömu ríkisstjórnar að kanna skuli hug landsmanna til áframhaldandi viðræðna um aðild landsins.
Svarthöfða finnst það argasti dónaskapur að ekki skuli haldin þjóðaratkvæðagreiðsla um hvort ráðherrar í ríkisstjórninni eigi að tala við embættismenn ESB og jafnvel forsætisráðherra annarra ríkja, áður en þau samtöl fara fram.
Lágmark væri að biðjast leyfis hjá Morgunblaðinu áður en haldið er út í slík samskipti. Morgunblaðið veit enda miklu betur en þjóðin hvað henni er fyrir bestu.
Það flokkast með öðrum örfáum undrum veraldar að blaðið sé ekki lesið víðar en raun ber vitni.
