Xabi Alonso er orðaður sterklega við stjórastarfið hjá Chelsea þessa dagana. Eiginkona hans, Nagore Aranburu, hefur áður vakið athygli í umfjöllun enskra miðla.
Gamall liðsfélagi Alonso hjá Liverpool, Peter Crouch, rifjaði nefnilega upp vandræðalegt atvik frá fyrstu dögum sínum hjá félaginu árið 2005.
Crouch gisti þá á hóteli í Liverpool og sagðist hafa verið sannfærður um að glæsileg stúlka í móttökunni væri hrifin af sér. Hann montaði sig meira að segja við liðsfélagana á æfingu.
„Ég sagði við strákana: Hún er stórkostleg, ég held að ég eigi séns hér,“ rifjaði Crouch upp.
Það sem hann vissi ekki var að konan var þá þegar kærasta Alonso.
Jamie Carragher og aðrir leikmenn Liverpool skemmtu sér vel yfir þessu og hvöttu Crouch áfram áður en þeir upplýstu hann loks um sannleikann.
„Það kom í ljós að hún var kærasta Xabi Alonso. Hún vann þarna bara til að æfa enskuna sína,“ sagði Crouch og hló.
Alonso og Nagore giftu sig árið 2009 og eiga þrjú börn saman.
