Morgunblaðið skýrir frá þessu. Haft er eftir Bjarna að stefnt sé að því að framkvæma útboðið um mánaðamótin maí/júní, líklega verði það í júní en málin skýrist á næstu vikum. Hann sagði að leitast verði við að eignaraðildin verði dreifð eftir söluna. „Svo er ég líka að vonast til að með lækkandi vöxtum og fleiri fjárfestingarkostum haldi sú þróun áfram að fleiri taki þátt á hlutabréfamarkaði og að hér sé kominn fram kostur sem geti stutt þá þróun,“ er haft eftir honum.
Morgunblaðið segir að á opnum netfundi með Bjarna hafi komið fram að hann telji æskilegt að hægt verði að kaupa hluti fyrir nokkra tugi þúsunda í útboðinu og að Bankasýsla ríkisins muni skoða þessa hlið málsins. Lægri þröskuldar muni auka þátttöku almennings í útboðinu.
Hann sagðist vænta þess að ríkið fái 119 milljarða, hið minnsta, fyrir allan hlut sinn í bankanum sem er alfarið í eigu ríkisins. 119 milljarðar er sú fjárfesting sem lagt hefur verið í til að örva efnahagslífið vegna heimsfaraldurs kórónuveirunnar.
„Ég held að það sé alveg óhætt að segja að þar sem bankinn er með tæplega 190 milljarða eigin fé í dag hljótum við að hafa væntingar til þess, þegar allur bankinn hefur verið seldur, að við fáum að minnsta kosti fjárhæð sem jafngildir þessu átaki. Þá dregur það úr lánsfjárþörf sem nemur slíkum fjárhæðum,“ er haft eftir Bjarna.