Vegna samdráttarins sem fylgir kórónuveirufaraldrinum hafa flest sveitarfélög landsins samþykkt margvíslegar aðgerðir til að reyna að draga úr áhrifunum. Forsendur fjárhagsáætlana eru hrundar en samt sem áður ætla fæst sveitarfélaganna að draga úr áður ákveðnum fjárfestingum á árinu og sum ætla jafnvel að auka þær.

Þetta hefur Morgunblaðið eftir Aldísi Hafsteinsdóttur, formanni Sambands íslenskra sveitarfélaga, í umfjöllun um málið í dag.

„Mjög mörg sveitarfélög eru með gríðarlega mikið undir á árinu. Sum eru að bæta í en langflest ætla sér að halda áfram því sem þegar var ákveðið í fjárhagsáætlunum. Um er að ræða mjög háar fjárhæðir sem hlaupa á tugum milljarða sem sveitarfélögin eru að fara að fjárfesta fyrir á þessu ári.“

Er haft eftir henni. Jafnframt sagði hún að það væri merki um heilbrigði sveitarstjórnarstigsins að ráðist verði í framkvæmdir og aðrar aðgerðir í stað þess að draga saman seglin þegar áföll ríða yfir með tilheyrandi áhrifum á tekjuvonir.

„Það er hrun í útsvarstekjum, við erum ekki að fara að sjá tekjur af fasteignagjöldunum og erum líka að missa þjónustutekjur. Allir þessir tekjustofnar bresta að einhverju leyti og þá er auðvitað fátt um fína drætti til fjárfestinga og reksturs, þannig að sveitarfélögin eru mörg hver að fara að keyra sig áfram á lánum núna en þau ætla að gera það í þeirri trú að þetta sé tímabundið og að við sjáum fram á bjartari tíma.“