Þetta kemur fram í Morgunblaðinu í dag. Haft er eftir Kristrúnu að ekki sé ósennilegt að landsframleiðsla muni dragast saman um 8 til 10 prósent á þessu ári en það er svipaður samdráttur og gert er ráð fyrir í Evrópu en í Bandaríkjunum er rætt um 6 prósent samdrátt.
„Sú staðreynd að íslenskt hagkerfi er mjög háð tekjum af ferðaþjónustu þýðir að við gætum verið í efri endanum á þessu bili. Þá mun það einnig hafa mikil áhrif hversu lengi áhrifa veirunnar gætir og ef framlengja þarf samkomubannið eða setja það á í einhverri mynd aftur, þegar líður á árið, geta áhrifin hæglega orðið meiri.“
Er haft eftir Kristrúnu sem benti á að ástandið væri fordæmalaust og því hæpið að hefðbundin hagstjórnartæki komi að nægilega miklu gagni til að varðveita þrótt hagkerfisins. Einnig geti verið varhugavert að breyta bankakerfinu í einhverskonar hamfarasjóð sem láni aðallega til fyrirtækja til að brúa algjört tekjuhrun hjá þeim.
„Það gæti veikt kerfið sem er ekki byggt upp til að mæta áföllum sem þessum. Ef þróttur kerfisins er nýttur til að bæta tekjutap fyrirtækja verður svigrúmið til að lána til fjárfestinga mun minna og viðspyrnukraftur kerfisins því veikari en ella.“
