Markaður Fréttablaðsins skýrir frá þessu í dag. Haft er eftir Degi B. Eggertssyni, borgarstjóra, að viðræðurnar hafi verið mjög góðar fram að þessu. „Við höfum verið að benda á að ríkisstjórnir og seðlabankar hafa verið að styðja við sveitarfélög og borgir víðs vegar um heim. Hvort heldur að horft er til Bandaríkjanna eða Svíþjóðar, þar sem seðlabankar hafa verið að kaupa skuldabréf sveitarfélaga,“ er haft eftir Degi.
Rósa Guðbjartsdóttir, bæjarstjóri í Hafnarfirði, tók í svipaðan streng og sagði að Seðlabankinn eða ríkissjóður eigi að stíga inn og sjá til þess að sveitarfélögin fái sambærileg lánskjör og ríkið.
Samkvæmt fjárhagsáætlunum stærstu sveitarfélaganna fyrir næsta ár eru horfur á að veltufé frá rekstri muni dragast mjög saman en það hefur áhrif á fjárfestingargetu þeirra. „Miðað við fjármálaáætlun hins opinbera og nýjustu áætlanir sveitarfélaga er mikil lánsfjárþörf fram undan. Þessi þörf hefur legið lengi í loftinu og hefur stuðlað að hækkun langtímavaxta allt frá því í vor. Hærri vextir gætu leitt til þess að einhver sveitarfélög og fyrirtæki falli frá fjárfestingum. Sveitarfélög eins og aðrir verða auðvitað að gæta að skuldsetningu. Það væri vond niðurstaða fyrir hagkerfið ef opinberir aðilar skuldsettu sig um of. Það væri ávísun á hærri vexti og hærri skatta. Hvorugt held ég að sé heppilegt,“ hefur Markaðurinn eftir Stefáni Brodda Guðjónssyni, sérfræðingi í skuldabréfum hjá Arion banka.
