Þingflokksformenn stjórnarflokkanna sendu frá sér tilkynningu í dag þar sem útskýrt er af hverju lögð var fram frávísunartillaga á þá tillögu stjórnarandstöðunnar um að setja Bergþór Ólason af sem formann umhverfis- og samgöngunefndar á fundi hennar í morgun. Er tiltekið sérstaklega að frávísunartillagan sé ekki stuðningsyfirlýsing við Bergþór.

Tíundað er það sem Eyjan greindi frá í dag, um að slíkar ákvarðanir séu á forræði þingflokksformanna og formennska í nefndum sé hluti af samkomulagi meiri- og minnihlutans. Ekki hafi legið fyrir hver ætti að taka við af Bergþóri og því ríkt óvissa um hvort tillagan væri tæk.

Sjá einnig:  Þess vegna vildi meirihlutinn ekki setja Bergþór af sem formann

Tilkynningin í heild sinni:

Vegna fréttaflutnings af fundi umhverfis- og samgöngunefndar Alþingis

 Frávísunartillaga sem var samþykkt var á fundi umhverfis- og samgöngunefndar í morgun sneri einungis að tillögu þess efnis að setja ætti af formann nefndarinnar. Ekki lá fyrir tillaga um nýjan formann. Óvissa var um hvort tillagan væri tæk. Frávísunartillagan var ekki stuðningsyfirlýsing við nefndarformennsku Bergþórs Ólasonar.

 Formennska í umhverfis- og samgöngunefnd er hluti af samkomulagi milli meirihluta og minnihluta. Samkvæmt samkomulagi þingflokksformanna í kjölfar þingkosninga 2017 féll formennska í þremur nefndum í skaut stjórnarandstöðuflokka og formennska í fimm nefndum í skaut stjórnarflokkanna. Það er á forræði þingflokksformanna ef breyta á samkomulaginu og hafa þannig áhrif á nefndarformennsku.

 Undir þetta skrifa þingflokksformenn Vinstrihreyfingarinnar – græns framboðs, Sjálfstæðisflokks og Framsóknarflokks.