Kristján Þórður Snæbjarnarson, formaður Rafiðnaðarsambands Íslands, sækist eftir 2. sætinu á framboðslista Samfylkingarinnar í öðru hvoru Reykjavíkurkjördæminu.

„Í störfum mínum sem formaður Rafiðnaðarsambands Íslands og sem forseti Alþýðusambands Íslands hef ég barist fyrir betra samfélagi og gætt að hagsmunum launafólks. Nú býð ég fram krafta mína til að vinna að hag lands og þjóðar á Alþingi,“ segir Kristján Þórður í færslu á samfélagsmiðlum í dag.

Segir Kristján Þórður að Samfylkingin bjóði trausta forystu og nýtt upphaf fyrir landið. Flokkurinn hafi styrkt sambandið við verkalýðshreyfinguna, farið aftur í kjarnann og virkjað tengslin við hinn almenna launamann.

„Ég hef hrifist af þessum áherslum og vil leggja mitt af mörkum. Enda hefur verið skýrt ákall eftir fulltrúum launafólks á Alþingi til að tryggja að uppbygging samfélagsins taki mið af hagsmunum almennings frekar en sterkum sérhagsmunum,“ segir Kristján Þórður.

Kristján Þórður segist ungur hafa hafið þátttöku í kjarabaráttu og verið virkur í henni í 20 ár. Fyrst sem trúnaðarmaður á vinnustað, svo sem formaður verkalýðsfélags, formaður landssambands og um tíma sem forseti ASÍ.

„Sem iðnaðarmaður þekki ég vel til í ýmsum málaflokkum sem brenna á samfélaginu um þessar mundir og ég hef skýra sýn á það hvert við þurfum að sækja í húsnæðismálum, menntamálum og orku- og samgöngumálum svo dæmi séu nefnd,“ segir Kristján Þórður. „Næstu vikur verða mikilvægar fyrir framtíð Íslands. Verkefnin eru ærin og ég hlakka til þess sem koma skal. Fái ég brautargengi á lista Samfylkingarinnar þá hyggst ég taka leyfi frá störfum sem formaður RSÍ meðan á kosningabaráttunni stendur.“