Pósthlaupið verður haldið á laugardag vestur í Dalabyggð. Þetta er skemmtilegt utanvegahlaup um fáfarnar slóðir í stórbrotinni náttúru. Það verður vel tekið á móti hlaupurum þegar þeir koma í mark. Boðið verður upp á veitingar í Búðardal, útdráttarverðlaun, fjölskyldufjör, hoppukastala, þrautabraut og ís frá Erpsstöðum svo eitthvað sé nefnt.
Hlauparar geta valið um þrjár vegalengdir, 7 km, 26 km eða 50 km. Yngsta kynslóðin og áhangendur hennar geta valið að fara Póststubbinn, 1,5 km skemmtiskokk í bænum og fá allir þátttakendur lítinn glaðning. Allar nánari upplýsingar má finna á vefsíðunni hlaup.is þar sem skráningin fer fram. Þátttökugjald rennur óskipt til Björgunarsveitarinnar Óskar og Ungmennafélagsins Ólafs pá í Búðardal. Afhending keppnisgagna er í versluninni Hlaupár, Fákafeni 11 í Reykjavík og á keppnisdag, nk laugardag 27. júlí, við pósthúsið í Búðardal.
