Jóhann Scott Sveinsson, þrítugur Íslendingur, sem ákærður var fyrir vörslu og dreifingu barnaníðsefnis í Kanada er á flótta á undan réttvísinni. Jóhann, sem á íslenskan föður og skoska móður, var búsettur í borginni Abbotsford í Bresku-Kólumbíu þar sem ákæran var gefin út en nú er talið að hann hafi yfirgefið borgina. Handtökuskipun hefur verið gefin út en lögregluyfirvöld ytra vita ekki hvar Íslendingurinn er niður kominn.
Þetta kemur fram í frétt Vísis í morgun og er haft eftir lögregluyfirvöldum í Abbotsford.
Eins og áður segir snýr málið gegn Jóhanni að innflutningi og dreifingu barnaníðsefnis þar ytra í júní 2022 og janúar 2023 sem og vörslu barnaníðsefnis í maí 2023.
Í frétt staðarmiðilsins í Abbotsford kom fram að rannsókn málsins hafi hafist í mars 2023. Var haft eftir lögreglustjóra borgarinnar að rannsakendur málsins hafi lagt sig alla fram við rannsókn málsins og meðal annars með hjálp leitarheimilda hafi böndin beinst að Jóhanni.
Hann var handtekinn á meðan rannsókn málsins stóð yfir en síðan látinn laus áður en ákæra í málinu var gefin út. Hann hefur síðan ekki látið sjá sig þegar málið gegn honum hefur verið á dagskrá dómstóla þar ytra og er talinn hafa flúið borgina.
Jóhann hefur starfað við kvikmyndagerð hérlendis, er giftur íslenskri konu og eiga þau einn barnungan son saman.
