Hin rómaða rokkhljómsveit Scorpions hafa í samstarfi við úraframleiðandann Col & MacArthur gefið út armbandsúr. Úrið inniheldur bæði gítarstreng frá hljómsveitinni og bút úr Berlínarmúrnum.
Úrið fór í sölu í vetur og ber heitið „Wind of Change“ í höfuðið á hinu víðfræga lagi hinnar þýsku sveitar frá árinu 1990. En það lag hefur oft verið talið á meðal merkustu laga 20. aldarinnar.
Ballaðan „Wind of Change“ var samin á þeim tíma þegar kalda stríðinu var að ljúka, Berlínarmúrinn að falla og Sovétríkin að liðast í sundur. Lagið varð nokkurs konar viðlag þeirra gríðarlegu þjóðfélagsbreytinga.
Samsæriskenningar um lagið hafa dúkkað upp og um það verið gert heilt hlaðvarp. Það er að bandaríska leyniþjónustan CIA hefði samið lagið en ekki rokkhljómsveitin frá Hannover, sem stofnuð var árið 1965. Fæstir taka þessar kenningar samt alvarlega.
Eftir að Rússar réðust inn í Úkraínu breyttu Scorpions textanum í flutningi sínum á tónleikum. Nú syngja þeir til heiðurs Úkraínu en ekki Rússlands. „Þetta er ekki tíminn til að rómantisera Rússland,“ sagði söngvarinn og lagahöfundurinn Klaus Meine um þessa textabreytingu.
Til eru tvær útgáfur af úrinu. Venjuleg útgáfa sem kostar 599 evrur (90 þúsund krónur) og sjálfvirk útgáfa sem kostar 1.699 evrur (254 þúsund krónur).
Fyrir utan að vera sjálfvirk inniheldur dýrari útgáfan gítarstreng frá hljómsveitinni sem sú ódýrari gerir ekki. Ekki kemur fram hvort að strengurinn komi frá aðalgítarleikarinum Matthias Jabs eða ryþþma gítarleikaranum og aðallagahöfundinum Rudy Schenker. Það kemur hins vegar fram að strengirnir hafi verið notaðir á síðasta tónleikaferðalagi sveitarinnar, árið 2023.
Báðar útgáfur af úrinu innihalda vottað brot úr Berlínarmúrnum.
