Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, segir íslensk sjávarútvegsfyrirtæki þurfa að stækka eigi Ísland að vera samkeppnishæft á alþjóðlega vísu í greininni í framtíðinni. Hún telur kröfu um að fyrirtæki með mikla hlutdeild aflaheimilda séu skikkuð til að vera skráð á hlutabréfamarkað munu leiða til þess að þeim fækki og stækki jafnframt því sem slíkt fyrirkomulag geti stuðlað að sátt um sjávarútveginn.

Heiðrún Lind er gestur Ólafs Arnarsonar í hlaðvarpi Markaðarins.

Heidrun Lind Klippa 4

Telur hún að það orðið grunnur að sátt í sjávarútvegi að fyrirtæki verði að vera skráð á markað til að mega eiga tiltekið hlutfall aflaheimilda?

„Mér finnst það bara góð hugmynd. Mín tilfinning er að eftir að Brim og núna Síldarvinnslan voru skráð á markað sé þekking á sjávarútvegi vera meiri, umfjöllun um sjávarútveg er meiri .þannig að atvinnugreinin verður aðgengilegri fólki og skiljanlegri. Fréttirnar eru hefðbundnari. Gengur vel eða gengur illa, hvað er verið að veiða, er niðurskurður eða aukning? Allt þetta sem sjávarútvegur er að glíma við verður kannski sýnilegra fólki og þar með eykst þekkingin.

Það er lík það að þarna koma inn einstaklingar og lífeyrissjóðir og hafi hagsmuni af því að vel gangi. Ég held að það sé tvímælalaust til bóta.

Nú er líka annað sameinað fyrirtæki búið að boða skráningu á markað, Ísfélagið sem sameinaðist Ramma og ég myndi klárlega telja þetta jákvætt skref fyrir sjávarútveginn sem eykur umfjöllun og bætir aðgengi fólks að atvinnugreininni.“

Heiðrún Lind segist aðspurð telja að gefa ætti aðlögunartíma áður en farið væri að takmarka aflaheimildir til fyrirtækja sem ekki eru skráð á markað. Hún telur skref í þessa átt munu leiða til þess að fyrirtækjum í sjávarútvegi fækki og þau stækki. Íslensk sjávarútvegsfyrirtæki þurfi að stækka og þróunin sé í þá átt. Fiskvinnslum verði að fækka og þær verði að stækka eigi Ísland að vera samkeppnishæft á alþjóðlega vísu í framtíðinni.