Nóg var að gera hjá Lögreglunni á höfuðborgarsvæðinu frá kl 17 í gær til klukkan 5 í morgun.
Samkvæmt tilkynningu var mest um að vera hjá lögreglustöð 1 sem sér um miðbæ Reykjavíkur, vestur- og austurbæ og Seltjarnarnes. Þar var aðili í miðbænum til ama og óþurftar í og við fyrirtæki. Honum var gefið tækifæri til þess að láta af hegðun sinni en lét sér ekki segjast. Aðilinn var handtekinn þar sem hann reyndist svo vera með fíkniefni á sér og var vistaður í fangaklefa.
Tilkynnt var um spyrnu og bifreiðahitting. Ekkert reyndist í gangi þegar lögregla kom á staðinn.
Ökumaður stöðvaður þar sem grunur lék á að hann væri undir áhrifum fíkniefna. Hann var að auki án ökuréttinda. Hann var látinn laus að blóðsýnatöku lokinni.
Fjórir ökumenn voru stöðvaðir vegna of hraðs aksturs og eiga þeir yfir höfði sér sekt. Þar af var einn ekki búinn að endurnýja ökuréttindi.
Tveir ökumenn stöðvaðir þar sem þeir reyndust ölvaðir og voru látnir lausir að blóðsýnatöku lokinni.
Við vínhúsaeftirlit reyndist einn skemmtistaður með fjóra dyraverði án tilskilinna réttinda. Þá voru ungmenni undir 20 ára inni á staðnum. Rætt var við ábyrgðarmann rekstrar og honum kynnt að lögregluskýrsla yrði rituð um málið.
Tilkynnt var um áflog fyrir utan bar. Málið var leyst á staðnum þegar lögregla kom. Á sama bar voru þrjú ungmenni undir 18 ára inni á staðnum. Lögregluskýrsla var rituð um þann hluta málsins.
Tilkynnt var um aðila sem svaf ölvunarsvefni á hóteli við brotna rúðu. Upplýsingar voru fengnar frá aðilanum og honum sleppt að upplýsingatöku lokinni.
Tilkynnt var um líkamsárás í miðbænum. Haft var uppi á gerendunum þar sem einn þeirra hljóp frá lögreglu. Þeir voru handteknir og fluttir á lögreglustöðina á Hverfisgötu. Einn aðilanna var vistaður í klefa en tveimur sleppt að lokinni upplýsingatöku.
Lögreglumenn við eftirlit voru stöðvaðir af borgurum sem tilkynntu líkamsárás. Árásaraðilinn var handtekinn og vistaður í klefa. Málið er í rannsókn.
Fyrir utan það kom til kasta lögreglustöðvar 3, sem sér um Kópavog og Breiðholt, tilkynning um átök í Kópavogi þar sem hugsanlega væri aðili með vopn á vettvangi. Árásaraðilar voru farnir þegar lögregla kom en fundust stuttu seinna. Þeir voru vistaðir í klefa vegna málsins og er það sagt í rannsókn.
Hjá lögreglustöð 4 sem sér um Grafarvog, Grafarholt og Mosfellsbæ kom upp umferðarslys milli tveggja ungmenna á léttum bifhjólum (vespum). Ökumennirnir eru ómeiddir en bifhjólin óökufær. Ráðstafarnir voru gerðar fyrir bifhjólin og forráðamenn látnir vita.
