Baráttukonan og hlaðvarpsstjórnandinn Edda Falak rauf þögnina í gærkvöldi í færslu á Instagram og sagði að hún hafi mátt þola linnulaust áreiti og persónuárásir fyrir að hafa veitt brotaþolum vettvang til að segja sögur sínar undanfarin ár.

Sjá einnig: Edda Falak rýfur þögnina – Nauðsynlegt að staldra við eftir „linnulaust áreiti og árásir“

Edda birti svipaða en lengri færslu á Facebook þar sem hún ræddi um fjármálalífið í Kaupmannahöfn og útskýrði hvað hún hafi verið að hugsa þegar hún laug um starfsferill sinn í viðtölum.

„Áður var ég við nám í Copenhagen Business School þar sem ég var í tengslum við fjármálafyrirtæki, bæði á meðan að á námi mínu stóð og eftir nám. Ég kynntist fjármálalífinu í gegnum viðburði, verkefni og námið mitt. Í viðtölum sem ég veitti eftir heimkomuna reyndi ég að varpa ljósi á menningu og viðhorf sem ég mætti þar. Hugsun mín í þeim viðtölum var að einfalda frásögnina í þeirri viðleitni að hlífa sjálfri mér og þeim sem sýndu mér vanvirðingu. Ég er breysk eins og annað fólk. Ég hef beðist velvirðingar á því,“ segir hún og heldur áfram:

„Það sem ég veit fyrir víst er hvaða viðhorfum ég mætti þarna úti, sem og hér heima. Ég og allar hinar. Ég mun halda áfram að segja okkar sögur. Alveg sama hvaða gröftur vellur upp. Því kvenfyrirlitning og kerfisbundið ofbeldi gegn konum á ekki að viðgangast í heilbrigðu samfélagi.“

Edda segist ætla að taka smá tíma til að hlúa að sjálfri sér.

„Eftir allt sem á undan er gengið er nauðsynlegt fyrir mig að staldra við og hlúa að sjálfri mér. Ég ætla að nýta tímann til þess að hvíla mig og ákveða næstu skref. Árásir á mína persónu munu ekki stoppa mig né aðra sem standa í sömu baráttu fyrir réttlátu samfélagi. Samtakamáttur okkar er ofbeldinu yfirsterkara og við munum ekki leggjast niður og láta ofbeldið yfir okkur ganga.

Að lokum vil ég þakka öllum þeim sem hafa sýnt mér stuðning og staðið með mér, þið eruð ómetanleg. Það stendur engin ein undir svona og ég gæti þetta ekki án ykkar.“

Pistilinn í heild sinni má lesa hér að neðan.