Boris Johnson, fyrrum forsætisráðherra Bretlands, er einarður stuðningsmaður Úkraínu í stríðinu við Rússland. Hann var í Washington D.C. í Bandaríkjunum í gær þar sem hann kom fram á vegum hugveitunnar Atlantic Council.

Sky News segir að Johnson hafi komið fram hjá hugveitunni til að þrýsta á Vesturlönd að halda áfram að styðja Úkraínu. Hann sagði að „engar gildar ástæður séu fyrir töfum“ á stuðningi Vesturlanda við Úkraínu.

Hann sagði að vestræn bandalagsríki Úkraínu „eigi að láta Úkraínumenn fá allt það sem þeir þurfa til að binda endi á þetta stríð“. „Látum þá fá þessi verkfæri núna,“ sagði hann.

Hann sagði að ef Úkraínumönnum takist að ná landræmunni á milli Maríupól, Donbas og Krím muni það hjálpa til við að binda endi á stríðið: „Ef þeir ná Melitopol og Berdiansk og Maríupól, ná þessum svæðum, þá er þessu lokið hjá Pútín.“