Eyþór Máni Steinarsson, stofnandi og framkvæmdastjóri Hopp, segir stærsta misskilninginn varðandi gervigreind vera þann að hún muni einfaldlega útrýma störfum. Í nýjum þætti Gervigreindarklúbbsins ræðir hann við Stefán Atla Rúnarsson um gervigreind, framtíð hugbúnaðar, sjálfkeyrandi bíla, nýsköpun og íslenskt samfélag.
Í þættinum segir Eyþór að umræðan um gervigreind snúist of oft um hvaða störf tæknin muni leysa af hólmi. Að hans mati felst raunverulega breytingin í því að gervigreind gerir hæft fólk enn öflugra, sérstaklega þá sem hafa reynslu, innsæi og kunnáttu til að nýta verkfærin vel.
„Ég tel að gott og hæft fólk þurfi ekki að hafa neinar áhyggjur af gervigreind,“ segir Eyþór. „Tæknin gerir fólki, sem býr yfir miklum bakgrunni og þekkingu, kleift að auka framleiðni sína til muna.“
Eyþór bendir á að gervigreind sé þegar farin að gjörbreyta hugbúnaðargerð. Hann segir afkastagetu hugbúnaðarteyma hafa aukist mikið og að framtíðin gæti orðið sú að fyrirtæki og einstaklingar smíði sínar eigin lausnir í stað þess að kaupa tilbúinn hugbúnað sem hentar ekki fullkomlega þörfum þeirra.
„Á endanum verður þetta svo þróað að fólk getur skrifað sérsniðinn hugbúnað til að leysa eigin vandamál,“ segir Eyþór. „Þetta mun valda mikilli umturnun í nýsköpunarumhverfinu.“
@gervigreindarklubÞátturinn er kominn á allar helstu hlaðvarpsveitur. Í þessum þætti af Gervigreindarklúbbnum fær Stefán Atli til sín Eyþór Mána Steinarsson, stofnanda og framkvæmdastjóra Hopp, í líflegt samtal um gervigreind, samgöngur, nýsköpun, pólitík og það hvernig einstaklingar geta haft raunveruleg áhrif á samfélagið.♬ original sound – Gervigreindarklubburinn
Í samtalinu ræða Stefán og Eyþór einnig framtíð samgangna á Íslandi. Eyþór telur að sjálfkeyrandi bílar geti orðið mikil bót fyrir íslenskt samfélag, en varar við því að ofmeta hraðann á innleiðingu tækninnar. Hann bendir á að fram undan sé langt aðlögunartímabil þar sem sjálfkeyrandi bílar og hefðbundnir bílar verði saman í umferðinni.
„Ég er efasemdamaður um að allir verði komnir á sjálfkeyrandi Teslur hér í Reykjavík eftir fimm eða tíu ár,“ segir Eyþór. „Það verður alltaf langt umbreytingartímabil.“
Þá nefnir hann þá hugmynd að nýta forgangsakreinar Borgarlínu fyrir sjálfkeyrandi bíla, svo fremi sem það trufli ekki almenningssamgöngur. Hann segir sérstaklega spennandi ef slíkir bílar yrðu hluti af deilihagkerfi frekar en í einkaeign.
„Bíllinn er eitthvað sem ég tel að flestir væru til í að losna við að eiga og yrðu mjög ánægðir með þá breytingu,“ segir Eyþór.
@gervigreindarklubÍ þessum þætti af Gervigreindarklúbbnum fær Stefán Atli til sín Eyþór Mána Steinarsson, stofnanda og framkvæmdastjóra Hopp, í líflegt samtal um gervigreind, samgöngur, nýsköpun, pólitík og það hvernig einstaklingar geta haft raunveruleg áhrif á samfélagið.♬ original sound – Gervigreindarklubburinn
Í þættinum er einnig rætt um nýsköpunarumhverfið á Íslandi, hlutverk ríkis og sveitarfélaga, mikilvægi grasrótarstarfs og hvernig gervigreind getur gert fleirum kleift að stofna fyrirtæki, smíða hugbúnað og hafa áhrif á samfélagið.
Að lokum hvetur Eyþór ungt fólk til að efla sjálfstraust sitt, sérhæfa sig í einhverju og hafa trú á því að það geti haft áhrif á umheiminn.
„Reynið að finna leið til að hafa áhrif á umhverfi ykkar hvernig sem það er útfært,“ segir Eyþór.
Gervigreindarklúbburinn hefur nú þegar gefið út 33 þætti og fengið til sín fjölbreytta gesti úr atvinnulífi, stjórnmálum, lögfræði, listum, tæknigeiranum og nýsköpun. Meðal gesta sem hafa komið í þáttinn eru til dæmis Arnar Þór Jónsson, Stefán Þór Þorgeirsson, Einar Þorsteinsson, Ingibjörg Isaksen, Ingi Bauer, Maggi Mix og fleiri áhugaverðir einstaklingar sem hafa rætt áhrif gervigreindar frá ólíkum sjónarhornum.
