Allt að 20% ótímabærra dauðsfalla tengjast beint neyslu ofurunnina matvæla. Undir þetta falla til dæmis pítsur, kökur og pylsur. Matvæli af þessu tagi eru oft stútfull af sykri, salti og fitu. Það eykur hættuna á offitu, hjartasjúkdómum og öðrum krónískum sjúkdómum.

Daily Mail segir að brasilískir vísindamenn hafi árið 2019 sagt að ætla mætti að um 57.000 Brasilíumenn, á aldrinum 30 til 69 ára, hafi látist af völdum neyslu ofurunninna matvæla. Þetta eru tæplega 22% dauðsfalla af orsökum sem hægt er að koma í veg fyrir í þessum aldurshópi og um 10% allra ótímabærra dauðsfalla í landinu.

Fram kemur að sérfræðingar segi að í hátekjulöndum á borð við Bandaríkin, Kanada og Bretland, þar sem neysla skyndibitafæðis er meiri, megi reikna með að þessar tölur séu enn hærri.

Dr Eduardo Nilson, næringarfræðingur við Sao Paulo háskólann og aðalhöfundur rannsóknarinnar, segir að neysla á ofurunnunum matvælum tengist mörgum sjúkdómum, til dæmis offitu, hjartasjúkdómum, sykursýki, krabbamein og fleiri sjúkdómum. Þessi matvæli tengist fjölda ótímabærra dauðsfalla í Brasilíu, dauðsföllum sem hefði verið hægt að koma í veg fyrir.

Hann sagði að eftir því sem hann og samstarfsfólk hans best viti þá hafi engin fyrri rannsókn lagt mat á hugsanleg áhrif ofurunninna matvæla á ótímabær dauðsföll.

Ofurunnin matvæli innihalda yfirleitt meira af gerviefnum en náttúruleg efni og eru gerð úr efnum sem eru unnin úr matvælum, til dæmis fitu, sterkju, viðbættum sykri og hertri fitu.

Rannsóknin hefur verið birt í vísindaritinu American Journal of Preventive Medicine.