Bandaríski ofurstórmeistarinn Wesley So, heimsmeistari í Fischer-slembiskák, segist styðja aðgerðir Magnus Carlsen, heimsmeistara í klassískri skák, og þá herör sem Norðmaðurinn hefur skorið upp gegn svindli í skák. Eins og frægt er hefur Carlsen ýjað að víðtæku svindli bandaríska stórmeistarans Hans Niemann sem hefur orðið til þess að sá bandaríski hefur kært Norðmanninn ásamt hópi annarra aðila og krafist milljarða í skaðabætur.
Margir af sterkustu skákmönnum heims eru staddir hérlendis til að freista þess að hirða heimsmeistaratitilinn í Fischer-slembiskák af So en þar á meðal Carlsen sjálfur. Hingað til hafa fremstu skákmeistarar heims haldið sig nokkuð til hlés í fjölmiðlastorminum sem hefur skapast vegna svindlhneykslisins ef undan er skilinn bandaríski stórmeistarinn Hikaru Nakamura enda var hann einnig í hópi þeirra sem Niemann kærði.
So lýsti yfir stuðningi við Carlsen í viðtali á RÚV í gærkvöldi þar sem að farið var yfir fyrsta keppnisdag heimsmeistaramótsins.
„Í fyrsta lagi langar mig til þess að taka hattinn ofan fyrir Magnúsi Carlsen fyrir að hafa opnað á umræðuna. Hans [Niemann] er með slæmt orðspor í nettaflmennsku ,“ sagði So. Hann sagði hingað til hefði enginn á hæsta stigi skáklistarinnar verið gripinn glóðvolgur við svindl í raunheimum en einhverjir lægju þó undir grun um slíkt athæfi.
„Magnús hefur sterkar skoðanir á þessu og þessvegna greip hann til þess aðgerða. Mig langar til að fagna þeirri ákvörðun hans því að það hefur orðið til þess að skipuleggjendur skákmóta taka öryggisatriðin fastari tökum en áður. Ef hann hefði haldið áfram í mótinu og kvartað bak við tjöldin þá hefði ekkert breyst,“ sagði So.
Páll Magnússon, þáttastjórnandi, spurði þá So hvort að hann styddi sumsé aðgerðir Magnúsar. „Já, ég geri það. Ég hef hinsvegar ekki enn skrifað neitt á netinu um málið því ég vildi ekki fá á mig kæru,“ sagði So og hló.
Horfa má á viðtalið við So á heimasíðu RÚV. Það hefst á mínútu 5:30.
