Aðfaranótt sunnudagsins 31. desember árið 2017 varð örlagaþrunginn atburður á Goðatorgi í Hafnarfirði. Var þetta á fimmta tímanum en tveir ölvaðir flugmenn voru þá saman í buggy-bíl, einskonar leiktæki sem er ætlað til aksturs utanvega. Ökumaðurinn missti stjórn á bílnum sem lenti á gangstéttarkanti, fór yfir gangstéttina, lenti á ljósastaur og kastaðist síðan utan í klettavegg áður en hann valt og staðnæmdist á hægri hlið.
Ökumaður bílsins slapp tiltölulega lítið meiddur en farþeginn örkumlaðist fyrir lífstíð og getur ekki tjáð sig skilmerkilega í dag. Mun hann aldrei getað unnið aftur og þarf sólarhringsumönnun út ævina. Fyrr í vikunni féll dómur í skaðabótamáli þolanda slyssins gegn VÍS sem skerti bætur hans um 2/3 á grundvelli meðsektar hans, þar sem hann hefði mátt vita að ökumaður bílsins væri undir áhrifum áfengis. Dæmdi Héraðsdómur tryggingafélaginu í vil.
Þetta er þó ekki eina dómsmálið sem rekið hefur verið vegna þessa hörmungaratburðar. Þann 21. október árið 2020 var ökumaður bílsins dæmdur í sex mánaða fangelsi, skilorðsbundið til tveggja ára. Hann var jafnframt dæmdur til tíu mánaða ökuleyfissviptingar. Ökumaðurinn var ákærður á grundvelli 219. greinar almennra hegningarlaga en samkvæmt henni getur sá sem veldur tjóni á líkama eða heilsu annars manns vegna gáleysis hlotið sekt eða fangelsi allt að fjórum árum.
Ökumaðurinn gaf skýrslu hjá lögreglu á sínum tíma vegna málsins en athygli vekur að hann mætti ekki til að gefa vitnaskýrslu fyrir dómi í skaðabótamáli farþegans og var þó boðaður með góðum fyrirvara.
Maðurinn er á skilorði vegna brotsins til 21. október næstkomandi. Samkvæmt áreiðanlegum heimildum DV er hann starfandi flugstjóri hjá Icelandair í dag, í millilandaflugi, og flaug m.a. farþegaþotu til Bandaríkjanna í síðustu viku.
DV sendi fyrirspurn til upplýsingasviðs Icelandair í gær. Er þar spurt hvaða reglur gildi um starfsfólk félagsins sem gerst hafi brotlegt við lög. Ennfremur var spurt út í hvaða áhrif það hefði á framgang flugstjóra í starfi að hann gerist sekur um ölvunarakstur. Í dag var fyrirspurninni fylgt eftir með símtali við starfsmann á upplýsingasviði. Í kjölfar símtalsins var fyrirspunin uppfærð og send að nýju. Ekki bárust svör við fyrirspurninni við vinnslu fréttarinnar.
Kl. 16:40 barst DV svar frá Ásdísi Ýr Pétursdóttur, upplýsingafulltrúa Icelandair. Svarið er eftirfarandi:
„Viðkomandi starfsmaður er í leyfi frá störfum. Að öðru leyti getum við ekki tjáð okkur um málefni einstakra starfsmanna.“
Í svarinu tjáir Ásdís sig ekki um það hvaða reglur gildi hjá Icelandair varðandi starfsmenn sem gerast sekir um hegningarlagabrot, þ. á m. ölvunarakstur.
