Kona, sem fædd er árið 1997, og starfaði á dvalarheimili Hrafnistu við Sléttuveg í Reykjavík, hefur verið sakfelld fyrir ítrekaða þjófnaði frá íbúum heimilisins. Dómur féll í máli konunnar í Héraðsdómi Reykjavíkur í gær.

Brot konunnar voru töluvert umfangsmikil og ófyrirleitin. Hún stal reiðufé úr herbergjum íbúanna og tók einnig kort frá þeim, komst yfir öryggisnúmer og notaði kortin til úttekta í verslunum.

Eru þetta samtals fimm brot sem varða þjófnaði úr herbergjum íbúa dvalarheimilisins en upphæðirnar nema samtals nokkuð yfir hálfa milljón króna.

Konan var einnig sakfelld fyrir að sett rangt skráningarnúmer á bíl sem hún ók um götur Reykjavíkur þar til lögregla stöðvaði hana.

Konan játaði brot sín skýlaust og var samvinnuþýð við rannsókn málsins. Veitti hún meðal annars heimild til húsleitar á heimili sínu. Var þetta virt henni til refsilækkunar.

Konan var dæmd í fimm mánaða skilorðsbundið fangelsi.