Það var ekki annað að sjá en að allt virkaði eins og það átti að gera þann 6. ágúst þegar Marsbíllinn Perseverance byrjaði að bora í yfirborð Mars til að taka jarðvegssýni. En vísindamönnum hjá bandarísku geimferðastofnuninni NASA brá mjög í brún þegar þeir sáu síðan að títaníumhólkurinn, sem sýnin áttu að fara í, var tómur.

Þetta kemur fram í fréttatilkynningu frá NASA. Fram kemur að NASA telur ekki að neitt sé að Perseverance, sem kostaði sem nemur um 45 milljörðum íslenskra króna, heldur hafi jarðvegurinn á Mars ekki verið eins og vænst er og því hafi borunin og sýnatakan farið úr skorðum.

Nú verður tíminn notaður til að greina þau gögn sem eru fyrir hendi og afla frekari upplýsinga til að öðlast skilning á af hverju enginn jarðvegur skilaði sér í hólkinn.

Perseverance er með útbúnað til að safna grjót- og jarðvegssýnum á stærð við fingur. Þessum sýnum á að pakka inn og safna saman í hólka úr títaníum. Áður en þeim er pakkað er myndavél notuð til að greina hversu miklu magni hafi verið safnað. Það var einmitt við það ferli sem í ljós kom að jarðvegssýnin voru horfin.